Fillimi i sezonit i Charles Leclerc në timonin e Ferrarit SF-23 nuk ishte ai më i miri, me një makinë që ka tradhtuar disa herë pilotin. Leclerc nuk ka arritur të shkojë përtej vendit të 7, si rezultati më i mirë, në tre gara të kondicionuara nga dy tërheqje. Nuk ishte fillimi që pritej, jo tre garat që do të kishte dashur numri 16 i Kokëkuqes, duke pasur parasysh ambiciet për titull ndaj Red Bull të Max Verstappen. E pikërisht nga shtëpia e demave mbërriti një lajm bombë për merkaton nga Helmut Marko: “Ka një klauzolë për tu larguar nga Ferrari”.
Gjatë një interviste për Sport Bild, Marko, konsulenti i Red Bull, zbuloi se kontrata e 25-vjeçarit mund të ndërpritet para kohe. Skadenca natyrale e vitit 2024, në fakt, mund të mos përfundojë, nëse do të krijohet një mundësi “e zezë” për pilotin e Ferrarit.
HIPOTEZA E MARKO
“Është e zakonshme që piloti të fitojë një numër minimal pikësh pak a shumë pak pas pauzës verore”, zbuloi Marko. Konsulenti i Red Bull hodhi pastaj bombën e merkatos në gazetën gjermane: “Nëse nuk arrihet sasia e pikëve, të dyja palët janë të lirë për të zgjidhur kontratën”. Fjalë, ose më mirë insinuata për momentin, të cilat kujtojnë atë që pësoi Red Bull pikërisht nga Ferrari: “Kjo klauzolë i lejoi Sebastian Vettel të bashkohej me Ferrarin në 2015-ën”.
Një situatë e vështirë për Ferrari dhe Leclerc. E piloti duhet të përballet me realitetin, me një shije të hidhur në gojë. Sezonin e kaluar, në fakt, me të njëjtat gara, piloti i skuderisë italiane kishte 71 pikë dhe ishte lider në kampionat. Sot është i dhjeti me 6 pikë dhe 63 pikë pas Verstappen. E mbi të gjitha 65 në krahasim me atë Leclerc të vitit 2022.
Nga ana tjetër, mendimi i konsulentit të Red Bull për Sainz është i ndryshëm: “Për momentin në Maranello nuk ka kuptim të duash të bësh pa Carlos Sainz. Ai po bën një punë të mirë”.
