Deputetët pritet të votojnë më 7 korrik një rezolutë që dënon gjenocidin e Srebrenicës pasi socialistët në pushtet shkaktuan zemërim duke hedhur poshtë një rezolutë të mëparshme të propozuar nga ish-deputeti dhe presidenti shqiptar Sali Berisha.
“Kemi rënë dakord që parlamenti të mbajë një seancë të posaçme për këtë çështje”, tha Taulant Balla, kreu i grupit parlamentar të Partisë Socialiste.
Balla tha se parlamenti shqiptar “duhet të shprehë qartë dënimin” e gjenocidit të boshnjakëve të vitit 1995 nga forcat serbe të Bosnjës.
Lexo më tej:
Andi Bushati: Vetëm Rama e ka në dorë ta lajë njollën e mbrojtjes së genocidit
Ish-presidenti Berisha paraqiti rezolutën e tij për të dënuar gjenocidin muajin e kaluar, ndërsa kritikoi kryeministrin shqiptar Edi Rama për marrëdhëniet e tij miqësore me presidentin serb Aleksandër Vuçiç.
Vuçiç dhe qeveria serbe nuk e pranojnë që masakrat e vitit 1995 përbënin gjenocid, pavarësisht vendimeve të gjykatave ndërkombëtare.
Berisha është përpjekur të pozicionohet në qendër të aktivitetit të opozitës që kur Departamenti Amerikan i Shtetit muajin e kaluar e akuzoi atë për përfshirje në “korrupsion madhor” dhe i ndaloi hyrjen SHBA.
Vuçiç: “Ne do t’i pengojmë rezolutat kundër genocidit në parlamentet mike”
Socialistët e hodhën poshtë rezolutën e Berishës si një përpjekje për të fituar legjitimitet për veten e tij. Por shumë në Shqipëri e hodhën poshtë këtë pikëpamje dhe mbështetësit e opozitës dhe aktivistët e të drejtave të njeriut shprehën pakënaqësi për dështimin e socialistëve për të dënuar gjenocidin.
Akoma më shumë zhurmë shkaktuan komentet e Ermonela Felaj, një deputete e Partisë Socialiste, e cila sugjeroi se rezoluta e propozuar e Berishës për të dënuar gjenocidin kishte për qëllim të dëmtonte nismën ekonomike ndërkufitare të Ballkanit të Hapur të Ramës dhe Vuçiçit.
Deklarata bombë/ Nuk e dënojmë genocidin serb, se pengon “Ballkanin e Hapur” (video)
Komentet e Felajt ndezën debatin nëse socialistët ishin gati të mos dënonin gjenocidin sepse donin të mbronin skemën e tyre rajonale.
Të enjten, Balla u përpoq t’i siguronte kritikët se partia e tij dhe parlamenti nuk kanë dyshime për këtë çështje.
“Ne do të ftojmë në votim përfaqësues të Bosnjës dhe Hercegovinës dhe anëtarët e familjeve të viktimave të këtij gjenocidi”, tha ai.
