Pentagoni pranoi se sulmi me dron në Kabul pak para tërheqjes së trupave amerikane goditi një makinë të gabuar dhe vrau 10 civilë të pafajshëm. Gjenerali Kenneth McKenzie, i Komandës Qendrore të SHBA foli për një "gabim tragjik" dhe duke ofruar ngushëllimet e tij më të thella për familjet e viktimave. 7 nga 10 të vdekurit ishin fëmijë.
Pavarësisht dyshimeve që u shfaqën në mediat amerikane dhe ankesave të familjeve të viktimave, deri më tani Pentagoni kishte mbrojtur “goditjen” e 29 gushtit duke deklaruar se ishte parandaluar një sulm vetëvrasës të drejtuar për në aeroportin e Kabulit.
“Është e pamundur që automjeti i goditur dhe njerëzit në bord të ishin të lidhur me Isis-K ose një kërcënim të drejtpërdrejtë për forcat amerikane. Shoferi ishte një punonjës i një organizate humanitare amerikane.
Ky sulm u nis me besimin e fortë se do të pengonte një kërcënim të afërt për forcat tona dhe evakuuesit në aeroport, por ishte një gabim dhe unë kërkoj falje të sinqerta" - tha McKenzie. Sipas CNN, gjenerali prandaj mori "përgjegjësinë e plotë për incidentin". Javët e fundit, Pentagoni kishte raportuar vdekjen e të paktën një ndërmjetësi të ISIS-K dhe 3 civilëve. ©LAPSI.al
