Sllovakia ka ndaluar zyrtarisht përdorimin e vaksinës ruse Sputnik V të martën, tha ministria e shëndetësisë.
“Në total, më shumë se 18,500 njerëz janë vaksinuar me Sputnik V,” tha Zuzana Eliasova, zëdhënëse e ministrisë së shëndetësisë.
Sllovakia bleu 200,000 doza Sputnik V në mars, duke u bërë shteti i dytë anëtar i Bashkimit Europian pas Hungarisë që përdori vaksinat, të cilat nuk janë të autorizuara nga Agjencia Evropiane e Barnave.
Blerja shkaktoi një reagim të madh politik dhe kërkesa ishte e ulët. Tre anëtarë të koalicionit qeverisës me katër parti ishin kundër blerjes, e cila përfundimisht bëri që kryeministri i atëhershëm Igor Matovic dhe ministri i tij i shëndetësisë, Marek Krajci, të jepnin dorëheqjen.
Qeveria e re e kryesuar nga Eduard Heger, u emërua më 1 prill. Në një intervistë për AFP në qershor, Heger tha se vendimi i Sllovakisë për të blerë vaksinat u mor kryesisht për shkak të presionit mbi furnizimet e vaksinave në atë kohë dhe nuk do të përsëritej.
“Vendimi u mor nën ndikimin e fortë, ndoshta ndikimin më të fortë, të pandemisë. Ne kishim nevojë për shumë vaksina, “tha Heger. “Me informacionin që kemi sot, nuk mendoj se një vendim i tillë do të merrej,” tha ai.
Një vend i Evropës Qendrore me 5.4 milion njerëz, Sllovakia ka regjistruar gjithsej 394,923 raste të Covid-19 që nga fillimi i pandemisë, përfshirë 12,548 vdekje.
