Nënkryetari i PD-së, Edi Paloka ka dhënë detaje për negociatat që çuan në regjistrimin në dy lista të ndara në KQZ të PD-së dhe LSI-së për zgjedhjet e 25 prillit. Në një prononcim për emisionin “Opinion”, Paloka tha se janë të bindur se në këtë mënyrë do të grumbullohen më shumë vota.
“Qëllimi i koalicionit është që ne të mundemi të garantojmë foltoren e zgjedhjeve për të sjellë ndryshimin që presin sot mbi 80% e shqiptarëve. Janë marrëveshje që rregullojnë marrëdhënien me partitë, por me qëllim të vetëm për maksimalizimin e votës.
Kryetarët e partive të opozitës do të jenë në listën e PD-së. Kemi një marrëveshje të hershme me ata. Ne kemi bërë studimet tona dhe na rezulton se LSI në një krah dhe PD në një krah do të maksimalizojë votën” – tha Paloka që ka folur edhe për rikthimin e bashkëpunimit me FRD-në e Bamir Topit.
“Deri në momentin që isha në seli, jemi ende pa konkluduar, por mendoj se jemi drejt konkludimit me atë parti. Pse u afruam? Sepse ne e këmi thënë që jemi të hapur të bashkëpunojmë me çdo parti apo individ që ka si qëllim largimin e Edi Ramës” – tha Paloka.
Ai është pyetur edhe për mungesën e bashkëpunimit me partitë e Astrit Patozit apo të Jozefina Topallit.
“E kemi thënë edhe publikisht. Ne jemi të hapur të bashkëpunojmë me çdo forcë që kërkon largimin e Ramës. Ka pasur edhe nga ata që edhe pse jemi në opozitë thonë se duhet të largohet Lulzim Basha” – tha Paloka. ©LAPSI.al
