I ndërgjegjshëm se arroganca ka një efekt negativ tek votuesit dhe duke qenë se jemi 2 muaj para zgjedhjeve, Edi Rama ka nisur të vetëkorrigjohet dhe të shfaqet gjithnjë e më i përulur dhe modest. Në një komunikim me ndjekësit në Facebook, kreu i qeverisë u duk mirëkuptues, ndërsa i përgjigjet të pakënaqurve që i kërkojnë të largohet, duke i vënë në dukje se largimin e tij e vendos populli.
Një pohim i tillë supozohet të jetë normal për kryeministrin e një vendi demokratik, por nuk është rasti për Edi Ramën, që pas 23 vitesh në pushtet e ka të vështirë të kontrollojë arrogancën. Çështja është se tani jemi në fushatë dhe arroganca është një luks që nuk mund t'ia lejojë vetes. Për të kuptuar se sa i vërtetë është kur shfaqet i sjellshëm dhe mirëkuptues në publik, vlen të kujtohet se si fliste pasi i kishte fituar zgjedhjet e vitit 2017. Atëherë kur ishte në fillim dhe jo në fund të një katërvjeçari tjetër. Në intervistën në Open, në Top Channel, në korrik të 2017, Rama thoshte se vendimi për t'u larguar nga politika, i përkiste atij vetë.
“S’ka filluar mandati i dyti, i treti është shumë larg. Kjo është çështje, të paktën për mua. Nuk e jetoj politikën për asnjë. Përveçse për misionin e jashtëzakonshëm për të lënë gjurmë. Të tjerat janë gjëra për mua dytësore. Në këtë aspekt, besoj se arsyeja që kam përçuar këtë energji, vjen që e kam brenda. Kur mos të ndjejë këtë energji që do më mungojë, nuk ka nevojë fare që të më thotë dikush tjetër, pasi vetëvetiu nuk është jeta që unë jetoj. Kështu që është e kot që të flasim për këtë. Do ja dal, Pasi në momentin kur të largohem, do të largohem kur të vendos unë, dhe jo kur të thonë njerëzit jo se ‘na erdhe në majë të hundës" thoshte Rama, që me gjasë nuk ka ndryshuar mendim. Thjesht, këto dy muaj nuk është koha për ta shfaqur arrogancën.
