Yuri Kim kundër Tom Doshit, një mandat më pak për Ramën?
Edi Rama që deri atëhere kishte komentuar se nuk priste që ambasadorja t'i tregonte detyrat e tij, kur erdhi puna tek emrat e përveçëm, i injoroi fare përgjigjet ndaj diplomates. Me sa duket, këtë qëndrim kreu i PSD, Doshi e mori si shkelje syri dhe të nesërmen shkoi e depozitoi kandidaturën e vet pranë KQZ-së. Deri këtu gjithçka qe normale. Sado me frymë hyjnore të jetë e mbarsur kryediplomatja amerikane në Tiranë, në ligjet e këtij vendi nuk figuron ndonjë nen që t'i pengojë qytetarët të kandidojnë për deputetë, kur sekretari i shtetit të SHBA-së të fut në listën e zezë të vendit të tij. Pra, kaq sa mund të bënte Yuri Kim e bëri me fjalë. Por justifikimi i sotëm ishte mëse i tepërt. Ajo i garantoi shqiptarët se Doshi nuk do të qe më ministër në qeverinë e re Rama pas 25 prillit, që me sa duket ambasadorja me testimet e saj e ka marrë për gjë të sigurtë. Se ç'lidhje kishte kjo gjë kur Yuri Kim e kishte përfshirë emrin e Doshit në kuadër të fushatës për pastrimin e listave të deputetëve, kjo gjë është vështirë të kuptohet. Se kur Tom Doshi ka pretenduar atë gjë, pra qënien pjesë e qeverisë, që zonja Kim, bën sikur po ia ndalon edhe kjo nuk imagjinohet dot.Video/ Rama kapet mat për sulmin e Yuri Kim ndaj Tom Doshit
Po kulmi arrin kur kryediplomatja citon: "Në fakt, kryeministri më kujtoi se ai e kishte përjashtuar personalisht këtë person nga PS”. Këtu mbërrinte kulmi se tashmë s'ka shqiptar që nuk e di se prej kohësh, Tom Doshi formalisht është pjesëtar i një partie tjetër. Se pse qe e nevojshme përmendja e këtij fakti, nuk është e lehtë të thuhet. Por me sa duket, zonja Kim ka vendosur ta konkurojë denjësisht paraardhësin e saj që ka mbetur proverbial me shprehjen: "shumë shpejt do goditen peshqit e mëdhenj". ©Lapsi.al
