Disa ditë pas marrjes së dozës së parë të vaksinës Pfizer, mjeku infeksionist, Pëllumb Pipero është infektuar me koronavirus. Pyetja që shtrohet në këtë rast është si ka mundësi që Pipero ka rezultuar pozitiv në testin e tamponit, ndonëse ai ishte nga të parët që u vaksinua në Shqipëri. Si u prek ai nga Koronavirusi ndonëse mori 16 ditë më parë dozën e Pfizer? Në fakt këtu nuk ka asnjë çudi.
Pipero ishte në mesin e tre mjekëve të parë që u vaksinuan me vaksinën e Pfizer, pas kryeministrit Edi Rama.
Kolegu i tij epidemiologu Ilir Alimehmeti ka shpjeguar se që të quhesh i mbrojtur nga vaksina e Pfizer duhet së pari të marrësh të dy dozat me një afat kohor tre javë larg njëra tjetrës. Alimehmeti tha për News 24 se vaksina në 10-12 ditët e para nuk është në lojë, pra personi që i është injektuar mund të quhet në këto ditë i pavaksinuar.
Gjithashtu, me një dozë mund të quhet vetëm 33% i vaksinuar. Ndërkohë që edhe studimet për Pfizer tregojnë se fakti që ke marrë vaksinën nuk do të thotë se personi nuk infektohet pasi vaksinimi të mbron 94.7% për rastet e rënda të sëmundjes.
Prandaj Pëllumb Pipero që ishte në mesin e tre mjekëve të parë që u vaksinuan pas kryeministrit Edi Rama u prek nga koronavirusi ndonëse kishte marrë dozën e parë të vaksinës.
Drejtoresha e Institutit të Shëndetit Publik, Albana Fico, gjithashtu u shpreh në News 24 se trupi i njeriut nis të krijojë antritrupat e parë 12 ditë pasi ka marrë dozën e parë të vaksinës, dhe është i mbrojtur nga virusi një javë pas dozës së dytë.
©Lapsi.al
