Edi Rama dhe Lulzim Basha kanë vijuar edhe sot përplasjen në distancë për procesin e integrimit. Kryeministri Rama e vuri përballë kryeministrit të Maqedonisë së Veriut, Zoran Zaev, i cili kur ka qenë në opozitë, shprehej se nuk kishte luftuar asnjëherë kundër negociatave.
Menjëherë pas deklaratës së Ramës, vjen edhe reagimi i kreut të Partisë Demokratike, Lulzim Basha, i cili sjell në vëmendje deklaratat e disa liderëve të vendeve të BE, si Angela Merkel e Gjermanisë, Emmanuel Macron i Francës, Mark Rutte i Holandës dhe ministres për Çështjet Evropiane, Tytti Tuppuraine, të cilët thonë se Shqipëria nuk i bindi për një vendin unanim në KE. (Citimet poshtë)
“Megjithë lojërat e Ramës për tu fshehur pas propagandës, të gjithë e shohin me sy të vërtetën. Ai dështoi të na afrojë me Europën, siç dështoi të përmirësojë ekonominë dhe të luftojë korrupsionin.
Shqipëria e meriton hapjen e negociatave. Shqiptarët meritojnë më të mirën. Për fat të keq ka një njeri që e pengon këtë rrugë. Europa e refuzoi, tani është koha ta refuzojnë shqiptarët”, shkruan Basha.
Tekstet e plota të citimeve të liderëve europiane:
Kancelarja e Gjermanisë, Angela Merkel: Shqipëria nuk na ka bindur që të marrim një vendim unanim.
“Maqedonia e Veriut ka bërë shumë sa i përket hapjes së negociatave. Ndryshimi i emrit ka qenë një progres i madh, edhe Shqipëria ka bërë progres, por nuk na ka bindur që të marrim një vendim unanim.”
Presidenti i Francës, Emanuel Macron: Shumica e shteteve ishin kundër Shqipërisë.
“Dje dëgjova disa fjalë se ne pothuajse arritëm uninamitet për hapjen e bisedimeve me Shqipërinë dhe Maqedoninë e Veriut. nuk është e vërtetë. Padyshim, aty kishte një shumicë te gjerë që Maqedonisë së Veriut ti hapen negociatat, por shumica e shteteve ishin kundër Shqipërisë. Nisja e bisedimeve të anëtarësimit vetëm me një vend do të ishte një gabim.
Kryeministri i Hollandës, Mark Rutte: Pyesim veten sa progres është arritur dhe me Shqipërinë kemi më shumë shqetësime.
“Ne, si shumë vende të tjera ende jemi të shqetësuar – diçka më pak për Maqedoninë e Veriut dhe më shumë për Shqipërinë. Pyesim veten se sa ka shkuar progresi në Shqipëri dhe, pikërisht këtu, kemi më shumë shqetësime.”
Tytti Tuppurainen, Ministre e Finlandës për Çështjet Europiane: Diskutuam edhe ndarjen e Maqedonisë së Veriut nga Shqipëria
“Përdorëm të gjitha mundësitë për t’i ofruar diçka Ballkanit Perëndimor, përfshi dhe ndarjen e dy vendeve, sepse shumica ishin të parimit se vendet duhen vlerësuar në bazë të meritës.
