Deputetja demokrate, Rudina Hajdari, kryetarja e grupit parlamentar demokrat në një postim në facebook shkruan se Edi Rama dhe Lulzim Basha, krerët e partive kryesore në vend kanë nevojë për një “shkollë politike”.
“Duhet një “shkollë politike” për kryetarët e partive kryesore mbi ndryshimin e sistemit në mënyrë që të bien me këmbë në tokë”.
Më tej Hajdari shkruan se marrëveshjet nuk e shpëtojnë dot më opozitën që ndodhet në rrugë, edhe në këtë sesion të ri parlamentar.
Sipas saj deri më tani kreu i demokratëve Lulzim Basha duhet të kishte dhënë dy herë dorëheqjen, sepse demokratët nuk kanë ndërmend ta bëjnë Edi Ramën, të pavdekshëm.
“Marrëveshja nuk e shpëton dot këtë herë opozitën joparlamentare. Deri tani Kryetari i Partisë Demokratike duhet të kishte dhënë dorëheqjen 2 herë, dhe me këtë marrëveshjen tjetër që kërkon të bëjë me Ramën me anë të “Platformës Kombëtare” (pa realizuar asnjë objektivë deri tani) do jetë e treta e vërteta. Sepse demokratët nuk kanë ndërmend ta bëjnë Edi Ramën, të pavdekshëm”,- shkruan Hajdari.
