Policia e Tiranës ka reaguar përmes një njoftimi lidhur me ngjarjen e mbrëmjes të së dielës, kur pranë derës së banesës së nënkryetarit të Bashkisë së Kamzës, Vendim Demaj, ka shpërthyer një sasi tritoli.
Sipas Policisë, lënda plasëse nuk ka shpërthyer në banesën e Demaj, por në banesën e marrë me qera nga shtetasi Paulin Gjegjaj.
Sakaq, në njoftim bëhet me dije se grupi hetimor po vijon punën për zbardhjen e rrethaneve të ngjarjes, identifikimin dhe kapjen e autorit.
Lajmi është bërë i ditur fillimisht nga zyra e shtypit e Partisë Demokratike, që ngriti edhe pretendimin e fshehjes së ngjarjes nga Policia.
NJOFTIMI
Më datë 04.08.2019, rreth orës 23.30, tek kthesa Kamzës në katin e tretë të një pallati, në pjesën e derës së banesës së marrë me qera nga shtetasi P.Gj, ka shpërthyer një sasi e vogël lënde e dyshuar plasëse, ku në momentin e shpërthimit brenda në banesë nuk ka pasur njeri dhe si pasoje ka vetëm dëme materiale.
Grupi hetimor po vijon punën për zbardhjen e rrethaneve të ngjarjes, identifikimin dhe kapjen e autorit.
Metarialet i kanë kaluar Prokurorisë së Rrethit Gjyqësor Tiranë për veprime të mëtejshme, për veprën penale “Shkatërrimi i pronës me eksploziv”
