Kreu i delagacionit të PE, Tunne Kelam deklaroi se përgjimet e publikuara në media për blerje të votës janë raste të izoluara
Duke iu përgjigjur pyetjes së gazetarit të Neës24, Ergys Gjencaj mbi përgjimet e transmetuara edhe nga Zëri i Amerikës, Kelam tha se zgjedhjet konsiderohen legjitime dhe si rezultat dhe parlamenti është legjitim.
“Në fakt kolegu im Preda dhe kolegë të tjerë që kanë qenë vëzhgues, thanë se zgjedhjet konsiderohen legjitime dhe si rezultat dhe parlamenti është legjitim. Nuk mendoj se raste të izoluara të blerjes së votave kanë ndikim në panoramën e madhe. Megjithatë siç janë gjërat tani mendoj se duhet të vazhdojmë me këtë parlament." - u shpreh Kelam.
Sipas raportuesit për Shqipërinë Knut Fleckenstein, kjo është çështje për gjykatat dhe jo për parlamentin.
"Kjo është një cështje për gjykatat jo për parlamentin” tha ai.
I pyetur mbi kërkesën e opozitës për zgjedhje të parakohshme, me një qeveri tranzitore që do të garantojë një proces të lirë e demokratik, Kelam tha se një gjë e tillë do të dëmtonte procesin e hapjes së negociatave.
“Parlamenti është zgjedhur në mënyrë të ligjshme. Keni një qeveri legjitime, kështu që mendoj që përqendrimi e ideja e pasjes së një qeverie të përkohshme ose kalimtare do të dëmtonte përqendrimin që kishte për hapjen e negociatave.” - u shpreh kryesuesi i delegacionit të PE në Tiranë
