Në një kohë kur sot mbahet mbledhja e Këshillit Bashkiak, opozita ka braktisur sallën, në shenjë kundërshtie për Teatrin Kombëtar. Gjatë fjalës së tij kryebashkiaku Veliaj tha se opozita shkon në mbledhjet e Këshillit vetëm sa për të marrë pagat. Mes ironisë Veliaj tha se as në teatrin e kukullave nuk aktrohet kështu siç bën opozita.
Ndërkohë Mirela Bogdani, këshilltarja e FRD-së në Bashkinë e Tiranës iu bashkua nismës së opozitës, ndërsa braktisi sallën. Në një deklaratë për mediat teksa qëndronte përkrah Kreshnik Ccollakut, ajo tha se Veliaj po bën sjellje arbitrare sa i takon Teatrit.
“Unë nuk mund të vazhdoj të jem më pjesë e koalicionit të majtë. Duke nisur që sot dhe deri në përfundim të mandatit, nuk e konsideroj më veten pjesë e koalicionit të majtë”, tha Bogdani. Ndërkohë këshilltari i PD-së Çollaku tha se pas shembjes së teatrit fshihet ndërtimi i 6 kullave.
“Fronti opozitar do të zgjerohet edhe më tej. Kjo është përgjigjja më e mirë që një qeveri dhe një administratë e korruptuar po marrin. Opozita sot është edhe më e fortë”, tha ai.
