Qeveria shqiptare do të japë 100 mijë euro ndihmë për Greqinë pas zjarreve që përfshinë rajonin e Atikës, ku deri më tani kanë humbur jetën mbi 81 persona dhe 174 janë të plagosur.
Sipas vendimit të Këshillit të Ministrave fondi i ndihmës ndaj Greqisë do shërbejë për lehtësimin e pasojave të shkaktuara nga zjarret masive. Fondi do të përballohet nga fondi rezervë i buxhetit të shtetit.
“Lutjet dhe mendimet tona kanë qenë me fqinjët tanë të mirë grekë dhe për shqiptarët që jetojnë atje. Ditët e fundit kanë qenë tmerrësisht tragjike, dhe në shpresojmë që ky kontribut i joni modest, t’u vijë në ndihmë në këto kohë të vështira” - thuhet në njoftimin e qeverisë në Twitter.
Përmes një postimi në Facebook, kryeministri Edi Rama thotë se Shqipëria ndjehet pranë Greqisë fqinje në këto orë tragjike.
“Shqipëria ndjehet veçanërisht pranë Greqisë fqinje në këto orë tragjike për ata që humbën të dashurit e tyre dhe po përballen me pasojat e dhimbshme të një zjarri të tërbuar! Qeveria Shqiptare sapo aprovoi një donacion në shenjë solidariteti me vëllezërit e motrat tona”- shkruan Rama.
