Për vrasjen e Agim Arapit 6 muaj më parë në Durrës u akuzuan vëllezërit Ekonomi. Pamjet filmike u publikuan në media. Dyshohet se Kujtim dhe Kostandin Ekonomi dhe Jurgen Kurti rrahën 58-vjeçarin për pagesën e qirasë duke e lënë të vdekur.
Spartak Ngjela ka ndjekur çështjen në interes së bashkëshortes së viktimës. Në një letër që i shkruan presidentit dhe Prokurorit të Përgjithshëm, Ngjela denoncoi prokurorin e çështjes që ka rrëzuar akuzën për bashkëpunim në vrasje të vëllezërve Ekjonomi.
“Në datën 11.04.2017, Kujtim Ekonomi dhe Kostandin Ekonomi kanë hyrë në dyqanin e viktimës, Agim Arapi dhe pa asnjë shkak konflikti, por vetëm të shtyrë nga një vrasës recidivist i quajturi, Jurgen Kurti, e kanë torturuar viktimën dhe ai ka vdekur, sepse ka pasur ndërhyrje kirurgjikale në zemër.
E këqyra me kujdes hetimin që i ka bërë Prokuroria Durrësit dhe na rezulton që në këtë çështje diskrititohet mbrojtja e individit nga shteti.
Në këto momente çështja është në gjyq, por siç e theksova më lart kjo mund të quhet një turp për drejtësinë shqiptare sepse: është një vrasje në bashkëpunim, e cila duhej të gjykohej sipas nenit 79/b të K.P, sepse vrasësi Kujtim Ekonomi e ka ditur që viktima ka qënë i sëmurë nga zemra pasi e ka njoftuar bashkëshortja e tij në momentet kur Kujtimi me të vëllain po torturonin viktimën Agim Arapi.
Veç kësaj që theksuam, konstatojmë se vetëm për faktin që Prokuroria e Durrësit, kërkon të çlirojë të dy vrasësit nga akuza në bashkëpunim, ka pushuar çështjen për Konstandin Ekonomin” shkruan Ngjela në letrën drejtuar presidentit.
Veç kreut të shtetit, avokati i është drejtuar me një letër edhe Prokurorit të Përgjithshëm të cilit i kërkon drejtësi për çështjen.
