Hiti i saj është përvetësuar në forma e variante nga më të ndryshmet dhe duket se artistët në botë, po garojnë të përfitojnë nga popullariteti i këngës “Bon Bon”. Krahas publikimeve remix apo cover në youtube, një version origjinal të krijimtarisë së Era Istrefit ka sjellë një i ri nga Kosova, i cili momentalisht po fiton terren tek përdoruesit shqiptarë të mediave sociale.
Drin Gashi është kapur me një nga elementët që të ngjall më shumë kuriozitet teksa dëgjon Era Istrefin. Muzika dhe stili i këngëtares nga Prishtina bëhet më interesant po të kemi parasysh tekstet gjysmë shqip e gjysmë anglisht. Të duhet disa herë të dëgjosh “Bon Bon”, e për çdo herë të zbulosh fjalë të reja. Në këtë kuptim, video e Drinit teksa reciton tekstin e këngës së Erës, të thjeshton punën për të kuptuar fjalët e saj.
Duket si parodi interpretimi i tij melankolik, por fakt është që kjo video po klikohet çdo orë e më shumë. Por, ende nuk dihet se çfarë mendon Era për këtë variant të “Bon Bon”.
