SPAK ka mbyllur hetimet për vrasjen e tregtarit Besnik Hida, të ndodhur në Lushnjë në tetor të vitit 2019, dhe ka kërkuar dërgimin e çështjes në gjyq për Ardjan Ahmetajn. Sipas Prokurorisë së Posaçme, Ahmetaj dyshohet se ka qenë bashkëpunëtor në ekzekutimin e 40-vjeçarit, i cili u vra me breshëri kallashnikovi teksa po pinte kafe në lagjen "Skënder Libohova". Dy autorët që qëlluan ndaj Hidës nuk janë identifikuar ende, pasi mbanin maska gjatë krimit.
Ndërkohë, SPAK ka kërkuar pushimin e çështjes për Laert Haxhiun dhe Orgest Bilbilin, duke argumentuar se nuk ka prova të mjaftueshme për përfshirjen e tyre në këtë ngjarje. Sipas hetimeve, autorët përdorën një automjet të grabitur më herët në Tiranë për të kryer atentatin. Besnik Hida ishte daja i Zamir Latifit, i cili humbi jetën në vitin 2017 gjatë të ashtuquajturës "Masakra e Lushnjës", ku objektivi ishte Xhulio Shkurti, nipi i Aldo Bares.
Ardjan Ahmetaj ndodhet aktualisht në burg në Greqi, ku po vuan një dënim me 11 vite burg për armëmbajtje pa leje. Ndërkohë, Laert Haxhiu vijon të gjykohet nga GJKKO për një sërë veprash të tjera penale.
