Prokuroria e Beratit ka kërkuar masa sigurimi për 11 persona të dyshuar se ushtronin aktivitet të paligjshëm të këmbimit valutor pa licencë. Për disa prej tyre është kërkuar masa "Arrest në shtëpi", ndërsa për të tjerët "Detyrim për t'u paraqitur në policinë gjyqësore". Hetimi zgjati gjashtë muaj dhe u shtri në pesë bashki të qarkut Berat. Sipas Prokurorisë, të dyshuarit administronin gjashtë subjekte tregtare të regjistruara për shërbime transfertash parash, si Unionnet dhe Western Union, por kryenin edhe këmbim valutor pa licencën e Bankës së Shqipërisë.
Për të dokumentuar aktivitetin, hetuesit kryen 28 veprime të simuluara këmbimi valutor dhe regjistrime të fshehta filmike e fotografike. Sipas Prokurorisë, këto prova vërtetuan se subjektet ushtronin aktivitetin në mënyrë të paligjshme. Gjatë kontrolleve u sekuestruan 88 milionë lekë, 118 mijë euro, 7.390 dollarë dhe 665 paund. Të 11 personat po hetohen për veprën penale "Ushtrimi pa licencë i veprimtarive financiare", ndërsa hetimet vijojnë për zbardhjen e plotë të aktivitetit të tyre.
