Një violinist profesionist me origjinë shqiptare është dënuar nga Gjykata Penale e Nicës në Francë, pasi u kap me 38 kilogramë kokainë të fshehur në automjetin e tij. 45-vjeçari u arrestua më 10 gusht në autostradën A8, pranë kufirit franko-italian. Gjatë kontrollit të makinës, doganierët zbuluan drogën me vlerë mbi 1 milion euro të fshehura nën tapetin e dyshemesë.
Pas arrestimit, hetuesit kontrolluan banesën e tij në Besançon, ku gjetën 90 mijë euro para të gatshme, katër armë zjarri dhe një sasi të madhe municionesh. Gjatë gjykimit, muzikanti deklaroi se kontratën për transportimin e drogës e kishte siguruar përmes disa të njohurve gjatë një udhëtimi në Shqipëri, ndërsa për këtë shërbim i ishte premtuar një pagesë prej 20 mijë eurosh. Ai nuk kishte precedentë penalë dhe jetonte në Francë që prej vitit 1991.
Mediat franceze shkruajnë se violinisti është anëtar me angazhim të përkohshëm i Orkestrës Simfonike Victor-Hugo Bourgogne-Franche-Comté. Drejtuesit e orkestrës sqaruan se arrestimi nuk kishte lidhje me aktivitetin e tij profesional. Gjykata e dënoi me katër vjet burg, një vit prej të cilit me kusht, si dhe me një gjobë doganore prej 1,1 milion eurosh, ndërsa prokuroria kishte kërkuar gjashtë vjet burg.
Artikulli i plotë: Në fillim të gushtit, një violinist profesionist, anëtar me kohë të pjesshme i Orkestrës Simfonike të Bourgogne-Franche-Comté në Francë, ishte arrestuar pranë kufirit franko-italian me 38,3 kilogramë kokainë të fshehur në makinën e tij. Të premten, Gjykata Penale e Nicës e dënoi me tre vjet burg pa kusht dhe me një gjobë të rëndë doganore.
I gjykuar më 9 tetor në Gjykatën Penale të Nisës për vepra që përfshinin, ndër të tjera, blerjen, mbajtjen dhe transportimin e lëndëve narkotike, si dhe pastrimin e parave dhe mbajtjen e armëve, ky baba i katër fëmijëve, me dëshmi penaliteti të pastër, u dënua me katër vjet burg, njëri prej të cilëve me kusht, si dhe me një gjobë doganore prej 1,1 milion eurosh. Kjo shumë korrespondon me vlerën e përllogaritur të ngarkesës së kokainës së sekuestruar. Prokuroria kishte kërkuar gjashtë vjet burg.
Ngjarja ndodhi më 10 gusht, kur doganierët kontrolluan një automjet Citroën C5 Aircross, të drejtuar nga një burrë, violinist profesionist, në pikën e pagesës së La Turbie, në autostradën A8, në departamentin Alpes-Maritimes. Nën tapetin e dyshemesë së makinës, ata zbuluan një sasi të madhe droge: saktësisht 38,33 kilogramë kokainë, me një vlerë prej pak më shumë se një milion eurosh nëse do të shitej në treg.
Por kjo nuk ishte e gjitha. Ndërsa muzikanti mbahej në ndalim policor në Nisë, hetuesit kontrolluan banesën e tij në Besançon, ku gjetën 90.000 euro para të gatshme, si dhe katër armë zjarri të kategorive B dhe C dhe një sasi të madhe municionesh.
Lidhur me shumën e madhe të parave, i dyshuari kishte deklaruar se bëhej fjalë për një dhurim nga babai i tij, Hasan Bakalli, gjithashtu violinist. Për mbajtjen e armëve dhe municioneve, ai ishte shpjeguar se merrej me qitje sportive.
Një marrëveshje e lidhur gjatë një udhëtimi në Shqipëri
Gjatë seancës së gjykimit të menjëhershëm në Gjykatën Penale të Nisës, 45-vjeçari nga Besançon, pa precedentë penalë, kishte deklaruar se e kishte siguruar këtë kontratë gjatë një udhëtimi në Shqipëri, vendin e tij të origjinës, përmes disa të njohurve. Për këtë shërbim, atij i ishte premtuar një pagesë prej 20.000 eurosh.
“Nuk arrij ta shpjegoj se si përfundova në këtë situatë”, kishte deklaruar ai gjatë marrjes në pyetje.
Beng Bakalli, 45 vjeç, i lindur në Shqipëri dhe i vendosur në Francë që prej vitit 1991, është violinist profesionist. Ai ka studiuar në disa konservatorë në Francë, në Lion, Dijon dhe Besançon, dhe është anëtar me angazhim të përkohshëm i Orkestrës Simfonike Victor-Hugo Bourgogne-Franche-Comté (OVH).
Në kohën kur ndodhi ngjarja, drejtuesit e orkestrës kishin theksuar se “arrestimi nuk kishte ndodhur gjatë angazhimeve të tij me OVH-në”. Ata kishin sqaruar gjithashtu se, nga 71 muzikantët që përbëjnë orkestrën, 30 janë anëtarë të përhershëm, ndërsa 41 të tjerët punojnë me angazhime të përkohshme. “Ai bën pjesë në kategorinë e dytë”, kishin saktësuar drejtuesit.
Nga ana e saj, bashkia e Besançon-it kishte deklaruar në atë kohë se bëhej fjalë për “veprimin e një individi të vetëm, i cili nuk duhet të ngatërrohet me Orkestrën Victor Hugo”.
