Studentët që protestuan këtë të martë para ministrisë së arsimit janë përballur me dhunën e forcave speciale në momentin që thyen dyert e godinës së ministrisë dhe kangjellat në Rrugën e Durrësit. Tubimi nisi i tensionuar me thirrjet “Duam kushte, duam dije, jo përralla qeverie”, “Kur zgjohet rinia, bie qeveria” dhe “Rama, jep dorëheqjen”.
Protestuesit u mblodhën rreth orës 14:00 në Rrugën e Durrësit, përpara godinës së ministrisë, ku ishin vendosur forca të shumta policore. Situata u tensionua kur një pjesë e të rinjve hodhën vezë, shishe uji, letra higjienike, gurë dhe kapsolla drejt institucionit. Në fasadën e ministrisë u shkrua “Ministri e Krimit”.
Por në momentin kur dera e hyrjes së ministrisë u hap dhe u hoqën kangjellat mbrojtëse, forcat speciale e policisë që ishin në pritje, kanë ndërhyrë ashpër duke përdorur shkopinjtë e gomës dhe ujin me presion kundër protestuesve.
Organizatorët kishin bërë thirrje për pjesëmarrje nga të gjitha qytetet e Shqipërisë, me synimin për të bashkuar studentët dhe qytetarët në një reagim më të gjerë.
Më poshtë mund të shihni videot nga protesta dhe incidentet përpara Ministrisë së Arsimit.
