Një person është vrarë dhe 11 të tjerë janë plagosur në një sulm të dytë në aeroportin ndërkombëtar në kryeqytetin saudit, Riad. Një zëdhënës i ushtrisë saudite tha se një predhë kishte goditur Aeroportin Ndërkombëtar King Khalid të dielën, duke shkaktuar një zjarr në njërën nga sallat e pasagjerëve.
Autoriteti i aviacionit civil të Arabisë Saudite bëri me dije në një deklaratë në X se nga sulmi kishte humbuj jetën, një banor pakistanez. Sulmi erdhi një ditë pasi një tjetër sulm në të njëjtin aeroport vrau 13 persona dhe plagosi më shumë se 308 të tjerë.
Huthët në Jemen thanë se qëndronin pas sulmeve dhe i paralajmëruan linjat ajrore dhe pasagjerët të mos përdornin aeroportet dhe hapësirën ajrore të Arabisë Saudite. Grupi tha se e kishin shënjestruar aeroportin me një përzierje raketash balistike dhe lundrimi, si dhe dronë gjatë 24 orëve të fundit.
Ata gjithashtu sulmuan objektet e naftës dhe aeroportin e Dammamit në Arabinë Saudite lindore. Huthët kanë thënë se po e sulmojnë Arabinë Saudite për shkak të mbështetjes së saj për forcat qeveritare në luftën civile të Jemenit, si dhe për një sulm ajror në aeroportin e Sanaas.
Të dielën, gjeneralmajor Turki al-Maliki, zëdhënës i koalicionit ushtarak të udhëhequr nga Arabia Saudite, tha se mbrojtja ajrore kishte kapur një raketë pranë aeroportit në Riad, ndërsa autoritetet po merreshin me zjarrin e shkaktuar nga një "predhë e panjohur" që goditi Sallën e Pasagjerëve Nr. 4.
Nga ana tjetër, presidenti i SHBA-së, Donald Trump, ka thënë se SHBA-të do të marrin një vendim dhe do të veprojnë shumë shpejt nëse do t’i sulmojnë Huthitët. Sulmi i së shtunës ishte sulmi më vdekjeprurës ndaj një vendi arab të Gjirit që nga fillimi i luftës midis Izraelit, SHBA-së dhe Iranit në shkurt.
