Partia Demokratike ka gati propozimin e saj për ndryshimin e sistemit elektoral, jo vetëm për zgjedhjet parlamentare, por edhe ato lokale.
Oerd Bylykbashi, i cili bashkëkryeson komisionin e posaçëm të reformës zgjedhore thotë se opozita do të kërkojë kalimin në sistemin proporcional kombëtar me lista 100% të hapura, përfshi edhe ato të këshillave bashkiakë për zgjedhjet vendore të 2027-ës.
“Unë vetë do të çoj përpara idenë e hapjes së listave 100% përsa i përket këshillave vendor. Sigurisht e komplikon procesin e KQZ, por rrit demokracinë në raport me mundësinë e zgjedhësve për të votuar”, tha bashkëkryetari i komisionit të Reformëz Zgjedhore, PD, Oerd Bylykbashi.
Një tjetër propozim është edhe zgjedhja e kryetarëve të bashkive me dy raunde. Rikthimi tek sistemi i balotazhit, që Shqipëria e ka aplikuar deri në vitin 2003 për Bylykbashin jep garanci që çdo kryebashkiak të ketë mbështetjen e mbi 50% të qytetarëve që e votojnë.
“Një kryetar bashkie nuk duhet të jetë thjesht i forcës politike, duhet të jetë i qytetarëve. Dhe një kryetar bashkie që zgjidhet me një shumicë të thjeshtë; 20%, 30% të votave sepse vota fragmentohet nuk përfaqëson vullnetin e shumicës së qytetarëve që kërkojnë zgjidhjen e halleve të tyre”, tha Bylykbashi.
Pavarësisht balancave mes drejtësisë së votës dhe mundësisë qytetare që garanton një sistem, Bylykbashi thotë se ai do të dështonte nëse nuk garantohet ndarja e partisë nga shteti.
“Çdo sistem do të dështonte nëse shteti nuk do të ndahet nga partia në pushtet. Shteti do të pushtonte zgjedhjet, dhe do të shpartallonte standardin e zgjedhjeve”, tha Bylykbashi.
Pas prishjes së konsensusit me socialistët për reformën territoriale, Bylykbashi se fsheh skepticizmin se i njëjti fat rrezikon edhe reformën elektorale.
Krahas reformës elektorale demokratët kërkojnë edhe hetim parlamentar për zgjedhjet e 11 majit, teksa kanë paralajmëruar përshkallëzim të aksionit opozitar në parlament dhe sheshe me qytetarët në rast të miratimit të njëanshëm të dy reformave. /tvklan.al
