Një mision kritik filloi sot për Kinën në hapësirë. Gjithçka lidhet me nisjen e misionit “Shenzhou-23”, i cili synon që të mbajë një astronaut kinez në orbitë për një vit të plotë për herë të parë. Ky është një hap kyç drejt qëllimit ambicioz të Pekinit për të dërguar njerëz në Hënë deri në vitin 2030.
Një raketë “Long March 2-F” u nis nga Qendra e Lëshimit Jiuquan në shkretëtirën Gobi të Kinës veriperëndimore të dielën. Ajo transportoi 3 anëtarë të ekuipazhit në stacionin hapësinor Tiangong (Pallati Qiellor).
Misioni shënon fluturimin e parë hapësinor nga një astronaut nga Hong Kongu, një territor gjysmë-autonom kinez. Li Jiaying, 43 vjeç, kishte punuar më parë për policinë e Hong Kongut.
Anëtarët e tjerë të ekuipazhit janë komandanti Zhu Yangzhu (39 vjeç), një inxhinier hapësinor dhe Zhang Ziyuan (39 vjeç), një ish-pilot i Forcave Ajrore i cili po shkon në hapësirë për herë të parë.
Ekuipazhi do të kryejë projekte të shumta në shkencat e jetës, materialet, fizikën e fluideve dhe mjekësinë. Por karakteristika kryesore e misionit “Shenzhou-23” është se një nga tre anëtarët e ekuipazhit do të qëndrojë në orbitë për një vit të plotë. Ky eksperiment do të lejojë të studiohen efektet e një qëndrimi të gjatë në mikrogravitet.
Kjo është thelbësore për t'u përgatitur për misionet e ardhshme me pilot në Hënë - dhe Mars. Astronauti që do të qëndrojë një vit në orbitë do të zgjidhet më vonë, në varësi të misionit.
Deri më tani ekipet në orbitë kanë kaluar zakonisht 6 muaj në orbitë përpara se të zëvendësohen. Misioni “Shenzhou-23” është pjesë e qëllimit të Kinës për të dërguar astronautë në hënë deri në vitin 2030, një garë që Shtetet e Bashkuara po e ndjekin gjithashtu me programin e tyre “Artemis”, i cili synon të dërgojë astronautë në hënë deri në vitin 2028, dy vjet përpara Kinës. ©LAPSI.al
