Skena kaosi ndodhën të shtunën në mbrëmje në Aeroportin Ndërkombëtar të Portsmouth në New Hampshire të SHBA, kur një 17-vjeçar, duke u përpjekur t'i shpëtonte policisë, futi makinën e tij në ambientet e aeroportit, duke thyer një gardh dhe më pas u përplas me një rimorkio kamioni dhe një avion të parkuar.
Sipas policisë së New Hampshire, gjithçka filloi pak pas orës 8 të mbrëmjes kur një oficer u përpoq të ndalonte një Ford Mustang të zi. Shoferi, i identifikuar si 17-vjeçari Wyatt Seeley nga Rochester, dyshohet se nuk iu bind urdhrit dhe u largua me shpejtësi.
Automjeti, sipas autoriteteve, po lëvizte pa drita të ndezura dhe po shkonte drejt aeroportit. Pak më vonë, Mustang u përplas me gardhin rrethues, të cilin e shkatërroi, dhe më pas hyri në zonën ku ishin parkuar avionët.
Makina goditi një traktor dhe më pas një avion të vogël, i cili ishte parkuar dhe për fat të mirë nuk kishte pasagjerë. Automjeti u ndalua dhe policia arrestoi shoferin 17-vjeçar. I riu u dërgua më pas në një spital lokal për vlerësim mjekësor. Sipas autoriteteve, i riu dyshohet se ishte nën ndikimin e alkoolit. Ai u akuzua për drejtim mjeti nën ndikimin e alkoolit, mosrespektim të urdhrit të oficerit të policisë, drejtim të rrezikshëm të mjetit dhe shkelje të detyrimeve të parashikuara pas një aksidenti rrugor. ©LAPSI.al
