Futbolli shqiptar ka marrë një lajm të hidhur sot, teksa është mësuar se ka ndërruar jetë në moshën 63-vjeçare ish-futbollisti vlonjat Agim Bubeqi.
Ish-sulmuesi i njohur i viteve ’80, pjesë e Flamurtarit që shkroi historinë në vendin tonë dhe në arenën ndërkombëtare, është gjetur i pajetë në banesën e tij këtë të mërkurë.
Dyshohet se kishte ndërruar jetë disa ditë më parë. Mungesa e tij është vënë re nga fqinjët, të cilët më pas kanë konstatuar situatën dhe kanë njoftuar për rastin.
Ai ka qenë pjesë e Flamurtarit gjatë një prej periudhave më të rëndësishme të historisë së klubit. Lajmi për ndarjen e tij nga jeta ka sjellë dhimbje te komuniteti sportiv dhe te ata që e kanë njohur gjatë viteve.
Rrethanat e vdekjes pritet të sqarohen nga autoritetet përkatëse.
Klubi i Flamurtarit ka ka bërë menjëherë një postim me mesazh ngushëllimi për ikonën e futbollit vlonjat.
“Flamurtari F.C. shpreh ngushëllimet më të sinqerta për ndarjen nga jeta të Agim Bubeqit, ish-futbollistit të viteve të arta të klubit tonë.
Kontributi dhe emri i tij do të mbeten pjesë e historisë dhe kujtesës së familjes kuqezi.
Ngushëllime të sinqerta familjarëve, të afërmve dhe gjithë komunitetit sportiv”, shkruhej në postimin e klubit. /LAPSI.al
