Ka nga ata që paguajnë (madje shumë, nëse kanë blerë një biletë stadiumi, por edhe në shtëpi në shumicën e vendeve nevojitet abonim për të parë të gjitha ndeshjet, për të ndjekur Botërorin e futbollit. Dhe ka nga ata që paguhen (po ashtu shumë) për të parë në televizion të gjitha ndeshjet e Kupës së Botës 2026, e cila sapo ka nisur në SHBA, Meksikë dhe Kanada.
“Puna e ëndrrave” për dy të rinjtë
Dy krijues amerikanë përmbajtjesh, Austin Franklin dhe Kevin Akoto, janë punësuar për një “detyrë” vërtet të veçantë: të shikojnë në televizion të gjitha 104 ndeshjet e Botërorit, jo nga shtëpia e tyre, por të mbyllur brenda një kubi të madh prej xhami transparent të vendosur në qendër të Times Square në Nju Jork. Nisma, e organizuar nga “FOX One” (platforma streaming e “FOX Sports”) në bashkëpunim me “Indeed” (një faqe për oferta pune), i ka shndërruar dy të rinjtë në një lloj “atraksioni turistik futbollistik”. Kushdo që kalon në një nga sheshet më ikonike të botës mund të ndalet dhe t’i shohë teksa ndjekin ndeshjet drejtpërdrejt.
Two football fans are being paid $50,000 each to watch all 104 #WorldCup games from a specially built cube in Times Square, New York. Austin Franklin & Kevin Akoto were picked from 6,000+ who applied. Fans are sitting outside the cube watching them watch the football... pic.twitter.com/3np0viqRvj
— Neil Johnston (@ndjohnston) June 11, 2026
Dy të rinjtë, të quajtur në këtë iniciativë “Chief World Cup Watchers”, do të jetojnë për më shumë se një muaj, deri në finalen e Botërorit më 19 korrik, brenda këtij salloni prej xhami, të pajisur me divane lëkure, frigorifer dhe gjithçka tjetër të nevojshme për të përballuar kalendarin shumë të ngjeshur të ndeshjeve. Austin dhe Kevin u zgjodhën mes më shumë se 6000 kandidatëve përmes Indeed. Të dy janë krijues përmbajtjesh të specializuar në futboll, ndaj janë perfektë edhe për të realizuar video reagimesh.
Sepse, përveçse do të shikojnë çdo ndeshje të Kupës së Botës nga kubi, ata do të duhet të krijojnë përmbajtje për rrjetet sociale (reagime, postime, video) dhe të ndërveprojnë me tifozët. Gjithashtu, sigurisht, do të jenë vazhdimisht të ekspozuar për publikun përmes mureve transparente të kubit: njerëz që shikojnë njerëz të tjerë duke parë futboll brenda një kubi xhami në mes të kaosit të Times Square. Jo keq si ide për të tërhequr vëmendjen, që është pikërisht objektivi i atyre që e kanë menduar këtë projekt.
Pse Austin dhe Kevin marrin kaq shumë para?
Për këtë detyrë të pazakontë, secili prej tyre do të marrë 50 mijë dollarë, me qëllimin final për të promovuar transmetimin e Botërorit në FOX One. Bëhet fjalë për një fushatë marketingu virale të studiuar në detaje nga transmetuesi amerikan, i cili dëshiron të flitet sa më shumë për shërbimin e tij streaming gjatë Kupës së Botës. Ndërkohë, partneri “Indeed” e shfrytëzon rastin për të treguar se në faqen e tij mund të gjenden edhe “punë ëndrrash”. Dhe kjo, për një tifoz futbolli, padyshim që është një e tillë.
