Dalin detaje të reja nga tentativa e vrasjes e ndodhur sot, 15 gusht, në një lokal të frekuentuar në Elbasan, ku një person dyshohet se ka tentuar të qëllojë me armë zjarri ndaj një tjetër personi.
Në vijim të ngjarjes, publikohet edhe foto nga lokali ku ndodhi incidenti, ndërsa hetuesit po punojnë për zbardhjen e plotë të dinamikës.
Sipas të dhënave paraprake, shënjestra ndodhej jashtë lokalit, ndërsa autori dyshohet se ishte ulur në një tavolinë tjetër, së bashku me një grua. Në një moment, ai është ngritur dhe i është afruar objektivit, duke i drejtuar armën.
Kur ka tentuar të qëllojë, pistoleta dyshohet se është bllokuar dhe nuk ka shkrepur. Episodi ka shkaktuar panik te klientët që ndodheshin në lokal, ndërsa autori është larguar nga vendi i ngjarjes.
Forcat e rendit vijojnë kërkimet për identifikimin dhe kapjen e autorit. Ndërkohë, grupi hetimor po mbledh prova dhe dëshmi nga personat që kanë qenë të pranishëm, për të përcaktuar me saktësi rrethanat dhe dinamikën e tentativës së vrasjes.
