Protesta e 133-të kundër qeverisë është shoqëruar me akuza ndaj policisë dhe kërkesa për hetimin e zyrtarëve të lartë. Aktivistët Sidorela Vatnikaj dhe Arben Kola kërkuan dorëheqjen e kryeministrit Edi Rama. Nga sheshi para kryeministrisë, Vatnikaj deklaroi se gjykata i ka cilësuar të paligjshme arrestimet e dy aktivistëve, të ndaluar për 72 orë pasi kishin goditur me vezë makinën e kryeministrit. Ajo e konsideroi vendimin një fitore për të drejtën e protestës paqësore, ndërsa theksoi se një tjetër protestues vijon të mbahet në paraburgim.
Aktivistja kritikoi gjithashtu deputeten Belinda Balluku, duke ngritur akuza ndaj saj dhe duke kundërshtuar pjesëmarrjen e saj në votimet parlamentare. Ajo deklaroi se protestuesit do të qëndrojnë të bashkuar, pavarësisht presioneve që pretendojnë se po ushtrohen ndaj tyre. Nga ana tjetër, Arben Kola i bëri thirrje SPAK dhe BKH të ndërmarrin veprime ndaj politikanëve dhe zyrtarëve të dyshuar për korrupsion, pavarësisht përkatësisë politike. Ai kërkoi gjithashtu mbështetjen e ambasadorit të ri amerikan, ndërsa kritikoi edhe disa media, të cilat i akuzoi për lidhje me interesa politike.
