Hetuesit realizuan të hënën një lexim me disa zëra të mijëra mesazheve të shkëmbyera mes 29 pin-eve SKY ECC, të përdorura për të organizuar vrasjen e Ardit Spahiut, i cili u ekzekutua më 27 nëntor 2020. Ekipi hetimor i ndau rolet, duke parashikuar nga një zë për çdo të akuzuar, me qëllim që të ndihmohej Gjykata e Krimeve të Rënda në Bruksel të orientohej mes nëntë personave që po gjykon.
BELGJIKE
Ky lexim kolektiv, i shoqëruar me një prezantim prej 260 slajdesh, ishte veçanërisht i dobishëm për të kuptuar përmbajtjen, tonin dhe vëllimin e bisedave të dekriptuara pjesërisht nga policia.
Nga mesazhet e lexuara në seancën e së hënës rezulton se pin-i SKY i atribuuar Flobenc Meçjas, i akuzuar si ekzekutori i vrasjes, e kishte ndjekur viktimën prej disa ditësh në Bruksel.
“Shpresoj ta mbarojmë këtë bastard deri në fund të muajit, sepse duhet të kthehem në Shqipëri se do lindë gruaja ime”, shkruan më 19 nëntor 2020 pin-i që prokuroria ia atribuon Flobenc Meçjas, drejtuar pin-it të atribuuar Franc Gergely-t (Çopjas).
Ditën e ngjarjes, më 27 nëntor 2020 në orën 17:56, pra dy minuta pas vrasjes, pin-i i atribuuar Flobenc Meçjas dërgoi një seri emojish (6 gishta të ngritur lart dhe 4 figura që ngrenë krahun), të ndjekura nga fjala “Ciao”, drejt pin-it SKY të atribuuar Franc Gergely-t.
Një pjesë e madhe e mesazheve të lexuara në seancë lidhen nga hetuesit me të akuzuarit Flobenc Mecja (43 vjeç) dhe Mikael Qosja (38 vjeç), të dy në mungesë dhe pa përfaqësim në gjyqin e tyre. Në krahasim, mesazhet e atribuara Franc Gergely-t (33 vjeç) ishin dukshëm më të pakta në pamjen e përgjithshme të paraqitur para gjykatës.
Megjithatë, sipas organigramës kriminale të prokurorisë federale, pini i Franc Gergely-t ishte pika lidhëse mes Flobenc Meçjas dhe Mikael Qosjas.
Seanca, e cila do të rifillojë të mërkurën pas një dite ndërprerjeje, mund të ndihmojë për ta sqaruar këtë çështje.
