Qendra Spitalore Universitare “Nënë Tereza” ka reaguar pas ikjes së energjisë elektrike për shkak të një defekti në linjën e furnizimit të tensionit të lartë që furnizon Godinën A2. QSUT pranon se ka pasur një ndërprerje të përkohshme të energjisë elektrike.
“Falë aktivizimit të menjëhershëm të sistemeve rezervë (UPS, Gjeneratorë), aparaturat mjekësore jetike kanë vijuar të funksionojnë normalisht, duke garantuar vijimësinë e trajtimit dhe duke mos u cenuar në asnjë moment jeta e pacientëve.
Menjëherë, ekipet mjekësore, teknike dhe drejtuese janë vënë në gatishmëri të plotë, duke vepruar sipas protokolleve të sigurisë dhe duke ofruar çdo suport të nevojshëm, për garantimin e shërbimit shëndetësor si dhe duke marrë masat e nevojshme” – thuhet në reagimin e QSUT.
“QSUT siguron qytetarët se situata është menaxhuar me përgjegjësi dhe profesionalizëm dhe se institucioni mbetet në gatishmëri të plotë, për të përballuar çdo situatë, në funksion të mbrojtjes së shëndetit dhe jetës së pacientëve. QSUT ka ngritur menjëherë grupin e punës për verifikimin e situatës” – thuhet në reagim.
Në rrjetet sociale u publikuan pamjet e rënda të filmuara nga disa qytetarë që ndodheshin pranë të afërmve të tyre në QSUT. Sipas denoncimeve dhe pamjeve video energjia ka munguar edhe në Reanimacion prej të paktën 20 minutash.
Energji elektrike nuk ka pasur as në korridore dhe as në sallat e operacionit. Në video duket qartë zona e reanimacionit në errësirë të plotë, një situatë që ngriti alarmin maksimal për sigurinë e pacientëve. ©LAPSI.al
