Kryeministri Edi Rama ka reaguar me një mesazh falënderues pas një vlerësimi të jashtëzakonshëm të marrë nga Presidenti i Emirateve të Bashkuara Arabe, Sheikh Mohammed bin Zayed Al Nahyan.
Përmes një postimi publik, Rama shprehet se është thellësisht i prekur nga surpriza e paimagjinueshme dhe nderimi i veçantë që i është bërë, teksa ka bërë të ditur se i është akorduar medalja më e lartë e Emirateve të Bashkuara, e cila mban emrin e themeluesit të shtetit, Sheikh Zayed.
"Thellësisht i prekur prej surprizës së paimagjinueshme dhe nderimit të jashtëzakonshëm nga presidenti i Emirateve të Bashkuara, Sheikh Mohammed bin Zayed Al Nahyan.
Akordimi i medaljes më të lartë të vendit mik, e cila mban emrin e themeluesit të Emirateve të Bashkuara, Sheikut Zayed, është respekti dhe vlerësimi më i madh për një kryeministër shqiptar, të cilin e mora përulësisht, plot krenari për Shqipërinë dhe me mirënjohje të thellë për mikun e madh të shqiptarëve, lartësinë e tij Sheikh Mohammed bin Zayed, si edhe për çdo shqiptar që ma ka besuar udhëheqjen dhe përfaqësimin e atdheut tonë të përbashkët", shprehet Rama.
