Makina që shikoni në foton e mësipërme, është mjeti tip “Audi”, me targë ‘AB 700 RS’, me të cilin dyshohet se është arratisur ditën e sotme nga spitali Rajonal i Durrësit, Altin Ndoci.
Sipas informacioneve, arratisja e Ndocit ishte e mirëplanifikuar, pasi automjeti në fjalë ka qenë duke e pritur atë në parkingun e spitalit. Targat e makinës kanë qenë të vjedhura pak ditë më parë.
Ndoci ishte paraqitur në spital për ndihmë mjekësore dhe ka kërkuar të shkojë në tualet. Aty është shoqëruar nga dy policë të burgjeve të cilët i ka dhunuar dhe më pas është larguar me vrap. Ai ka hipur në Audin dhe dyshohet se është nisur drejt Spitallës.
Nuk dihet ende se kush ka ndihmuar në arratisjen e Ndocit. Ai dyshohet nga SPAK si i përfshirë në vrasje, grup kriminal etj. Ai akuzohet nga Nuredin Dumani se ka qenë pjesëmarrës në masakrën e Bradasheshit, ku mbeti i vrarë vëllai i Endrit Alibej i njohur si "Tarzani", xhaxhait Arben Dylgjeri dhe një shtetasi turk.
Në një dosje tjetër Altin Ndoci, akuzohet nga SPAK si pjesëmarrës në vrasjen e Andi Zylyfit dhe plagosjen e Ardit Uruçit kryer në bashkëpunim në formën e “Grupit të strukturuar kriminal”.
Gjithashtu Ndoci, akuzohet për “Mbajtja pa leje dhe prodhimi i armëve, shpërthyese dhe i municionit”, e kryer në bashkëpunim në formën e grupit të strukturuar kriminal, “Grupi i strukturuar kriminal”, (në rolin e pjesëmarrësit). Ndoci akuzohet si pjestar i grupit "Çopja" në Elbasan". /LAPSI.al
