E quajtur “Ai”, një shimpanze femër e famshme për aftësitë e saj njohëse, ka vdekur në moshën 49-vjeçare. Lajmin e dha instituti japonez ku ajo jetonte. Qendra për Origjinën Evolucionare të Sjelljes Njerëzore e Universitetit të Kiotos tha se “Ai” vdiq më 9 janar nga pleqëria dhe dështimi i organeve.
“Ai” lindi në Afrikën perëndimore dhe mbërriti në institutin japonez në vitin 1977. Atje, ajo u bë pjesë e një projekti mbi "mendjen e shimpanzesë".
Ndër gjetjet e dukshme të institutit ishte fakti se “Ai” ishte në gjendje të përdorte numrat dhe të identifikonte ngjyrat. “Ai” thuhet se në një moment hapi kafazin e saj duke përdorur një çelës.
Studiuesit i dhanë “Ai”-së një tastierë të veçantë të lidhur me një kompjuter kur ajo ishte 18-muajshe, një pajisje që ata e përdorën për të studiuar kujtesën dhe të mësuarit e saj.
Në moshën 5-vjeçare, Ai zotëroi emërtimin numerik nga 1 në 6 dhe ishte në gjendje të emërtonte numrin, ngjyrën dhe objektin e 300 mostrave, sipas një punimi shkencor të vitit 1985.
Kur nuk merrte pjesë në teste njohëse, Ai njihej për kënaqësinë e saj në vizatim dhe pikturë. Ashtu si shimpanzetë e tjera në qendër, Ai shkruante mbi letër të bardhë pa pasur nevojë të motivohej nga shpërblimet e ushqimit.
Në vitin 2000 ajo lindi një djalë, Ayumu, i cili njihet gjithashtu për kujtesën e tij të jashtëzakonshme. ©LAPSI.al
