Kreu i Partisë Demokratike, Sali Berisha thotë se rënia dramatike e turizmit këtë verë nuk vjen vetëm nga çmimet e larta që kanë vendosur bizneset turistike, por edhe për shkak të keqmenaxhimit që po i bën qeveria burimeve natyrore.
Berisha rendit mes këtyre shkaqeve edhe faktin që impiantet e përpunimit të ujërave të zeza janë lënë pas dore, ndërsa malet me plehra digjen duke helmuar banorët vendas dhe turistët.
"Narkoshteti i falimentuar Ramaduros falimentoi me sukses edhe këtë degë kryesore të ekonomisë tonë" shkruan Berisha që i sheh shkaqet e dështimit të këtij sezoni turistik tek qeveria e Ramës.
Statusi i Berishës në rrjetet sociale: Rënie dramatike e turizmit.
Të dashur miq, me gjithë propagandën e neveritshme të Ramaduros dhe mediave të tij, rënia dramatike e turizmit nga viti në vit është tashmë realiteti që nuk mohohet. Shkaqe më kryesore të kësaj rënie pandalshme sigurisht janë narkoeuro dhe çmimet stratosferike. Por ka dhe shkaqe të tjera. Kështu, krahas brigjeve, ujërave, panoramave magjepsëse të natyrës që vendi ofron turistëve, Shqipëria e Ramaduros ofron turistëve gjirizet që derdhen në ujërat e detërave dhe liqeneve tanë, dhe kjo me gjithë impiantet e përpunimit të ujërave të zeza të ndërtuara nga Shëngjini në Sarandë, por që bashkitë socialiste u kanë vënë drynin për të mos paguar energjinë, ofron mungesën e ujit të pijshëm në piskun e zhegut dhe grumbujt e kodrat e plehrave në çdo skaj të vendit dhe tymin helmues e kancerogjen të maleve të plehrave që digjen nga dorë shtetërore kriminale. Narkoshteti i falimentuar Ramaduros falimentoi me sukses edhe këtë degë kryesore të ekonomisë tonë!
