Shërbimi i Mbrojtjes Civile në Rripin e Gazës njoftoi sot vdekjen e 44 personave në bombardimet e reja izraelite kundër enklavës palestineze. Ekipet e mbrojtjes civile transportuan në spitale të paktën 44 të vdekur, shumica gra dhe fëmijë, si dhe dhjetëra të plagosur pas masakrave të reja të kryera në shumë zona të Rripit të Gazës.
Qeveria izraelite njoftoi dje, të hënën, qëllimin e saj për të marrë kontroll të të gjithë Rripit të Gazës, ku dhjetëra palestinezë u vranë në bombardime të reja, ndërsa disa kamionë që transportonin ndihma humanitare hynë për herë të parë në më shumë se dy muaj.
"Luftimi është intensiv dhe ne po përparojmë.Ne do të marrim kontrollin e të gjithë Rripit të Gazës," deklaroi më parë Benjamin Netanyahu, pasi ushtria e tij njoftoi operacione tokësore në shkallë të gjerë në enklavën e vogël bregdetare.
