Roma fiton derbin me një paraqitje të shkëlqyer. Në javën e 19-të të Serie A, Roma e drejtuar nga Ranieri mposhti Lazion 2-0 dhe ngushtoi diferencën në renditje, duke arritur kuotën e 23 pikëve. Në “Olimpico”, gjatë pjesës së parë, verdhekuqtë zhbllokuan ndeshjen me një goditje të bukur të Pellegrinit (10’) nga kufiri i zonës dhe vetëm pak minuta më pas, dyfishuan avantazhin me një kundërsulm të finalizuar nga Saelemaekers (18’). Në pjesën e dytë, Lazio u hodh në sulm duke rritur ritmin, por Svilar ishte i pakalueshëm, ndërsa Tchaouna humbi një mundësi të artë duke goditur traversën. Në minutat shtesë pati tension në fushë dhe një përplasje që çoi në përjashtimin e Castellanos pas një dueli me Hummels.
Lexo më tej: Video / Serie A, Milan-Roma 1-1: Dybala përgjigjet Reijnders
Roma triumfoi, dhe me plot meritë. Rezultati u vulos brenda 18 minutave të para. Megjithatë, me Lazion që kërkonte rikthimin, derbi u shndërrua në një sfidë të hapur dhe emocionuese. Ndonëse pati tetë kartonë të verdhë (pesë për Lazion dhe tre për Romën), loja ishte intensive, por jo e ashpër. Episodet vendimtare ndodhën në fillim: në minutën e 10-të, Pellegrini, një surprizë në formacionin titullar, realizoi një gol spektakolar me të djathtën. Tetë minuta më vonë, Saelemaekers shënoi golin e dytë me një tjetër finalizim të bukur. Lazio reagoi, por pa qenë e rrezikshme. Në pjesën e dytë, presioni i skuadrës së Baroni-t u rrit, por mbrojtja e Ranierit rezistoi. Trajneri veteran mund të festojë një rekord tjetër: fitimin e një derbi në moshën 73-vjeçare. Në fund, ai u detyrua të ndërhynte për të qetësuar një përplasje që rezultoi me karton të kuq për Castellanos.
MONZA 1-2 CAGLIARI
Cagliari triumfoi 2-1 në fushën e Monzas në ndeshjen e orës 12:30, që shënonte mbylljen e fazës së parë të Serie A. Skuadra sarde, që vinte pas katër humbjesh radhazi si edhe Monza, u gjend menjëherë në disavantazh pas golit nga penalltia i shënuar nga Caprari në minutën e 5-të. Megjithatë, ata arritën të përmbysnin rezultatin gjatë ndeshjes. Në minutën e 22-të, Zortea barazoi me një goditje të fuqishme dhe të saktë nga kufiri i zonës, ndërsa në minutën e 56-të Piccoli finalizoi një kundërsulm të Obert, duke shënuar golin e dytë. Pesë minuta më vonë, përjashtimi i D’Ambrosio-s pas një faulli ndaj Mina-s shoi çdo shpresë të Monzas për të barazuar, duke e lënë atë në fund të tabelës së klasifikimit.
LECCE 0-0 GENOA
Java e 19-të nuk solli fat për Lecce-n, e cila goditi një shtyllë me Krstovic dhe pati disa mundësi me Dorgu, por nuk arriti të thyente mbrojtjen e Genoa. Në “Via del Mare”, ndeshja për mbijetesë përfundoi 0-0, ku Vieira arriti të merrte një pikë të merituar falë organizimit mbrojtës të skuadrës së tij. Ky ishte rezultati i pestë pozitiv radhazi për Genoa, që tani është tre pikë mbi vendin e tretë nga fundi, pikërisht Lecce, i cili ka arritur në pikë të njëjta me Cagliari pas fitores së tyre ndaj Monzas.
TORINO 0-0 PARMA
Ndeshja Torino-Parma, e vlefshme për javën e 19-të të Serie A, përfundoi pa gola. Torino luajti më mirë në pjesën e parë, por vuajti mungesën e efikasitetit në sulm dhe pritjet e mrekullueshme të portierit Suzuki. Parma u rrit në pjesën e dytë, duke goditur edhe një shtyllë me Mihaila, por nuk arriti të shënonte. Në fund, të dy skuadrat morën nga një pikë, duke qëndruar në pozita relativisht të qeta në tabelën e renditjes.
