Rusia dhe Ukraina kanë shkëmbyer qindra të burgosur lufte në një marrëveshje të ndërmjetësuar nga Emiratet e Bashkuara Arabe. Ministria ruse e mbrojtjes tha se kishte shkëmbyer 150 ushtarë ukrainas të mbajtur rob me një numër të barabartë trupash ruse. Presidenti ukrainas Volodymyr Zelenksy tha se 189 ukrainas ishin kthyer në shtëpi.
Ai shtoi se të liruarit përfshinin "mbrojtësit e Azovstal dhe Mariupol", termocentralin bërthamor të Çernobilit dhe “Ishullin e gjarpërinjve”. Jashtë një spitali në Ukrainën veriore, të afërmit qëndronin të shqetësuar në të ftohtë duke pritur për të dashurit e tyre.
Një grua, Alina, ishte duke pritur për burrin e saj, Oleksandr. Ai u kap duke mbrojtur qytetin e Mariupol në 2022. “Kam kaq shumë emocione” - tha ajo me lot në fytyrën e saj, "Ka qenë shumë e vështirë. Unë vetëm dua ta shoh atë."
Ministria ruse e mbrojtjes ndërkohë tha se trupat ruse të sapoliruara ndodheshin në Bjellorusi, një aleat i Rusisë, ku po u jepej ndihma mjekësore dhe mundësia për të kontaktuar familjet e tyre. Në një video të postuar nga komisionerja ruse për të drejtat e njeriut Tatyana Moskalkova, ushtarët shiheshin të mbledhur para drejtuesve me veshje ushtarake dimërore.
“Shumë shpejt djemtë tanë do të përqafojnë familjet dhe miqtë e tyre dhe do të festojnë Vitin e Ri në tokën e tyre të lindjes”, - tha ajo në një mesazh shoqërues. Ky është shkëmbimi i 59-të i të burgosurve që nga fillimi i pushtimit dhe një nga më të mëdhenjtë deri më tani.
Nga ana ukrainase, të liruarit përfshinin ushtarë, roje kufitare, roje kombëtare dhe ushtarakë të marinës. Shumë prej tyre kishin qenë në robëri për më shumë se 2 vjet e gjysmë dhe zyrtarët ukrainas thanë se disa ishin kthyer me sëmundje dhe lëndime të rënda.
Për disa familje, pasigurisë së dhimbshme i erdhi fundi. Por mijëra ukrainas të tjerë mbeten në robëri në Rusi dhe në pjesë të okupuara të Ukrainës. Zyrtarët në Kiev i thanë BBC-së se negociatat për shkëmbimin e të burgosurve janë bërë më të vështira muajt e fundit që kur forcat ruse filluan të bëjnë përparime të rëndësishme në fushën e betejës.
Ukraina nuk publikon numrat e të burgosurve të luftës që mbahen nga Rusia, por totali mendohet të jetë më shumë se 8 000. Zelensky tha se dy civilë të kapur në Mariupol ishin mes dhjetëra ushtarëve, rreshterëve, rojeve kufitare dhe oficerëve të liruar të hënën.
"Ne po punojmë për të çliruar të gjithë nga robëria ruse. Ky është qëllimi ynë. Ne nuk harrojmë askënd", - tha Zelensky. Ai postoi foto që tregonin disa nga burrat e shkëmbyer duke mbajtur lart flamujt verdheblu të Ukrainës.
Në maj të vitit 2022, Rusia shpalli fitoren pas një beteje disamujore për të pushtuar qytetin portual të Mariupolit në juglindje të Ukrainës, me luftëtarët e fundit që mbronin fabrikën e çelikut në Azovstal të qytetit që u dorëzuan.
Trupat ruse pushtuan Çernobilin në veriperëndim të vendit në fillim të pushtimit të tyre të Ukrainës në shkurt 2022, por më vonë ia kthyen kontrollin e uzinës punonjësve të saj. “Ishulli i gjarpërinjve” në Detin e Zi u kap gjithashtu në vitin 2022 dhe ushtarët ukrainas u kapën rob, por më vonë u shkëmbyen me robër rusë. ©LAPSI.al
