Cristiano Giuntoli ka qenë gjithmonë tifoz i Juventusit (“babai im ma ka përcjellë juventinitetin që në vogëli”, deklaroi ai sapo mbërriti te bardhezinjtë në korrikun e vitit të kaluar), por nuk ishte vetëm pasioni sportiv arsyeja që e bëri atë të linte Napolin, kampionin e ri të Serie A, për t’u transferuar në Torino. Toskanasi 52-vjeçar pranoi një ofertë ekonomike shumë të rëndësishme, që e bën atë drejtuesin më të paguar të futbollit italian, me një pagë neto prej 2,9 milionë eurosh në vit si Managing Director Football te “Zonja e Vjetër”.
Cristiano Giuntoli, drejtuesi më i paguar i Serie A: gati 3 milionë euro në vit
Sipas të dhënave zyrtare – të raportuara nga Calcio e Finanza dhe të marra nga bilancet e skuadrave të Serie A për sezonin 2023/24 – Giuntoli fiton rreth 3 milionë euro në vit, përfshirë një pjesë fikse dhe bonuse të lidhura me objektivat. Në organigramën e Juventusit ndodhet gjithashtu edhe drejtuesi i dytë më i paguar i futbollit italian sipas këtyre bilanceve, CEO-ja Maurizio Scanavino, i cili përfiton 1,22 milionë euro. Në vendin e tretë renditet Claudio Lotito, presidenti i Lazios, i cili ka marrë 1,1 milionë euro gjatë sezonit të fundit.
Claudio Lotito ka përfituar 1,1 milionë euro si president i Lazios
Në vendin e katërt gjendet një ish-drejtues i Serie A, ish-CEO-ja e Romës, Lina Souloukou. Ajo ka përfituar 850 mijë euro për sezonin 2023/24 dhe tashmë është transferuar te Nottingham Forest, ku do të mbajë të njëjtin rol drejtues. Klubi anglez e njoftoi disa ditë më parë këtë emërim, pas largimit të saj nga Roma në shtatorin e kaluar, në kulmin e krizës që pasoi shkarkimin e De Rossit.
Lexo më tej: “Juventus ka bërë një gabim të rëndë”: Sabatini e nxjerr të paaftë drejtorin Giuntoli
Më pas vijnë:
• Paolo Scaroni, presidenti i Milanit (600 mijë euro);
• Maurizio Setti, presidenti i Hellas Verona (550 mijë euro);
• Gianluca Ferrero, presidenti i Juventusit (405 mijë euro).
Beppe Marotta, pas juventinit Giuntoli me rolin e dyfishtë te Inter
Edhe pse shifrat e tij nuk janë zyrtare, Beppe Marotta, me rolin e tij të dyfishtë si AD dhe, pas ardhjes së Oaktree, edhe president te Interi, fiton më shumë se shumica e drejtuesve të përmendur më sipër, përveç Giuntolit. Në marrëveshjen e tij të mëparshme, përpara rinovimit të nënshkruar në nëntor 2023, paga e tij ishte rreth 1,5 milionë euro, një shumë që me shumë gjasë është rritur.
Përfitimet nga Këshillat e Administrimit
Sa i përket pagesave të anëtarëve të Këshillit të Administrimit (CDA), Milani ka qenë klubi më bujar gjatë sezonit 2023/24, me një total prej 4,3 milionë eurosh për administratorët e tij. Pasojnë Atalanta (3,8 milionë), Napoli (2,7 milionë), Interi (2,3 milionë), Juventusi (1,9 milionë), Lazio (1,2 milionë) dhe Roma (991 mijë euro).
