Fitore e vështirë, tri pikë të rëndësishme dhe disa polemika. Interi, pas një pjese të parë të vështirë, arriti të mposhtë Como, falë golit me kokë të Carlos Augustos dhe një tjetër realizimi të Marcus Thuram, i cili vazhdon të jetë vendimtar këtë sezon. Një sukses i rëndësishëm për ekipin e Inzaghit, që mbetet në ndjekje të Atalantës dhe Napolit. Por, përveç golit të francezit që mbylli ndeshjen, në fund pati një episod që tërhoqi vëmendjen: një ndërhyrje e ashpër e Lautaro Martinez ndaj Goldanigas, që arbitri Giua nuk e ndëshkoi me asnjë karton. Sipas TuttoSport, ky ishte një episod që mund të kishte përfunduar edhe me karton të kuq.
Rindërtimi i episodit nga TuttoSport
“Minuta 84:25 në kronometër, një top i kontestuar në gjysmën e fushës së Interit. Për topin garojnë Lautaro Martinez dhe Edoardo Goldaniga. Mbrojtësi i Como-s arrin i pari te topi, por kapiteni i zikaltërve nuk e ndalon vrapimin dhe e godet ashpër me takë, duke bërë një ndërhyrje me këmbën e ngritur lart. Një faull shumë i rrezikshëm, por gjyqtari Antonio Giua lejoi vazhdimin e lojës duke i dhënë avantazhin mysafirëve. Ndërhyrja ishte shumë e dhimbshme për Goldanigan, pavarësisht se Lautaro bëri shenjë se kishte prekur topin”.
Lexo më tej: Video/ Carlos Augusto e Thuram mposhtin Como: Inter i përgjigjet Atalantës
“Nga largimi potencial… te asnjë ndëshkim”
Një vendim që, sipas TuttoSport, ngjalli shumë dyshime: “Një faull i ardhur në një mënyrë që ngre pyetje mbi standardet e gjykimit. Këmba e ngritur lart dhe shpejtësia me të cilën Lautaro Martinez goditi kundërshtarin mund të kishin çuar edhe në karton të kuq për numrin 10 të Interit. Por arbitri nuk tregoi as karton të verdhë për argjentinasin në fund të aksionit të Como-s. Një vendim që ka lënë shumë të habitur: nga një largim i mundshëm… te mungesa e plotë e ndëshkimit.”
