Gjykata Kushtetuese ka hedhur poshtë ankimimin e partive të reja lidhur me ndryshimet në Kodin Zgjedhor.
Këto subjekte kishin kërkuar shpalljen si antikushtetuese të këtyre ndryshimeve, duke kundërshtuar marrëveshjen mes PD dhe PS për listat e mbyllura dhe rregullime të tjera.
Megjithatë, kërkesa e tyre nuk është pranuar nga Gjykata Kushtetuese, duke lënë në fuqi ndryshimet në Kodin Zgjedhor.
Gjykata vlerësoi se pretendimet e kërkuesve nuk janë të bazuara sepse lidhen me rezultat e votimit, që i korrespondon shpërndarjes së mandateve, ndërsa sipas nenit 64 të Kushtetutës, kjo shpërndarje dhe masa e shtrirjes së votimit parapëlqyes i është deleguar ligjvënësit, ndërkohë që garancia kushtetuese për ushtrimin e së drejtës së votës parapëlqyese në nenin 64, pika 3 të Kushtetutës lidhet me procesin e votimit.
Po ashtu GJK u shpreh se nuk konstatoi as cenim të parimit të barazisë përpara ligjit si për partitë politike ashtu dhe për organizatat dhe individët në dy aspektet e mësipërme, së drejtës për t’u zgjedhur dhe për të zgjedhur, për sa kohë që në analizë të pretendimeve të kërkuesve dhe të dispozitave objekt shqyrtimi, rezultoi se parashikimet ligjore i drejtohen në mënyrë të njëjtë të gjithë subjekteve zgjedhore dhe zgjedhësve, prandaj, për rrjedhojë, nuk bëjnë diferencim mes tyre në procesin e votimit.
