Mediat greke kanë zbuluar detaje tronditëse nga atentati që ndodhi këtë të diel në periferi të Athinës ku një shqiptar u vra ndërsa një tjetër mbeti i plagosur rëndë. “Protothema” shkruan se viktima është 45-vjeçari Irakli Davellas, (majtas në foton lart) shqiptar me pasaportë greke ndërsa i plagosuri është identifikuar si Edi Lulo (djathtas në foto).
Në pamjet e publikuara nga newsbomb.gr shihet viktima i shtrirë pranë një makine ndërsa i plagosuri është transportuar me ambulancë në spital. Duket se autorët e kanë organizuar më së miri pritën pasi kanë qëndruar në rrugë derisa ata kanë dalë nga lokali duke hapur zjarr ndaj tyre nga një makinë në lëvizje.
Autorët e kishin vjedhur po sot automjetin e përdorur në krim. Viktima është me origjinë nga Saranda, baba i një djali dhe një vajzë, pronar i një lokali në zonën e Peristerit. Viktima ishte i njohur për autoritetet pasi në vitin 2011 ndaj tij dhe 9 personave të tjerë, shumica pjesëtarë të grupeve mafioze ishte ngritur një çështje për përfshirje në grup kriminal, zhvatje etj.
Pak kohë më vonë emri i tij doli edhe në një dosje bashkë me 17 persona të tjerë se cilët kishin ngritur një rrjet në Korfuz për qëllime kriminale, falsifikim, etj. Ndërsa i plagosuri Edi Lulo, 46 vjeç lindur në Gjon të Pukës dhe banues në Kamëz thuhet se kishte vetëm pak ditë që ishte kthyer nga Dubai.
.jpg?t=lR1LC2J_9ZaPlChASesLyA)
Policia greke thotë se beson se bëhet fjalë për pastrim hesapesh, nisur nga e kaluara e 45-vjeçarit, i cili dyshohet se ka pasur lidhje edhe me 3 emra të njohur të botës së krimit. Sipas mediave greke bashkë me viktimën dhe të plagosurit ka qenë edhe një person i tretë, por që nuk është lënduar nga plumbat. Policia ka organizuar një operacion për kapjen e autorëve, por ende nuk ka detaje të reja. ©LAPSI.al
