Inter nuk arriti të siguronte tre pikët kundër Bayer Leverkusen. Humbja në Gjermani erdhi në minutat e fundit, duke i lejuar ekipit të drejtuar nga Xabi Alonso të bëjë një hap të madh përpara në renditjen e përgjithshme të Champions League. Për zikaltrit, tani është koha për të kthyer faqen, pasi në ndeshjen e ardhshme të kampionatit do të përballen me Lazion e teknikut Baroni, që sapo ka triumfuar ndaj Napolit në “Maradona”. Një përballje e rëndësishme për Interin, që sot ka një ditë pushimi të planifikuar më parë pas transfertës gjermane – një pushim i domosdoshëm.
Nata e vështirë pas humbjes ndaj Bayer
Pushimi nuk është i nevojshëm vetëm për shkak të lodhjes nga ndeshja e Champions, por edhe për shkak të një nate të trazuar që skuadra dhe e gjithë delegacioni i Interit përjetuan pas humbjes ndaj Bayer. Inter humbi fluturimin e planifikuar për në Malpensa nga Këlni, qytet që kishte pritur skuadrën në prag të ndeshjes. Arsyeja? Një defekt i vogël në avion që e bëri të pamundur nisjen e tij. Pritja ishte rraskapitëse, aq sa skuadra qëndroi brenda avionit deri në orën 4 të mëngjesit për të vendosur më pas që ishte më mirë të shtyhej fluturimi.
Lexo më tej: Video/ Mukiele dënon Inter, Liverpool bën 6 fitore në 6: spektakël në Atalanta-Real
Zgjidhja: një natë në Gjermani dhe kthimi në Milano
Skuadra kuptoi se riparimi i problemit do të zgjaste shumë dhe, duke qenë ora e vonë, vendosi të kalonte natën në Gjermani dhe të nisej për në Milano vetëm mëngjesin e sotëm. Për fat, Interi gjeti një hotel në minutën e fundit ku të gjithë mund të pushonin para se të niseshin ditën tjetër. Kështu, skuadra mbërriti në Itali sot rreth mesditës, duke përfituar nga fakti që dita e sotme ishte planifikuar si ditë pushimi.
Kthimi dhe përgatitjet për Lazion
Edhe sikur kjo ditë pushimi të mos ishte planifikuar, Interi me siguri do të kishte ndaluar sot për shkak të situatës. Përballja me Lazion, që është shumë e rëndësishme për renditjen, do të luhet të hënën. Kjo i jep skuadrës së Simone Inzaghi kohë të mjaftueshme për të rikuperuar energjitë dhe për të rifilluar stërvitjet nesër. Vetëm atëherë do të mendohet për transfertën në “Olimpico” dhe për sfidën ndaj ish-skuadrës së Inzaghi-t, që aktualisht është një nga ekipet më në formë në Serie A.
