Juglindja e vendit është zgjuar mëngjesin e kësaj të diele nën pushtetin e dëborës. Reshjet që vijuan gjatë natës u ndërprenë në mëngjes në zonat e ulëta ku ka nisur të bjerë shi me intensitet te ulët. Në lartësitë mbi 1200 metra mbi nivelin e detit po vazhdojnë reshjet e borës me intensitet mesatar.
Në Dardhë trashësia e dëborës ka shkuar në 15 cm dhe lëvizja e drejt fshatit turistik bëhet vetëm me goma dimërore. Akset nacionale te juglindjes qarkullohen normalisht, ndërsa aksi i ri, Qafë Qarri - Ersekë nuk është i kalueshëm. Mjetet lëvizin nga rruga e vjetër, e cila është e hapur. Ne zonat e thella malore te Korçës, Devollit, Pogradecit dhe Kolonjës trashësia e dëborës varion nga 20-30 cm.
Nga moti i keq kanë mbetur pa energji dhjetëra fshatra në Maliq, Devoll, Pogradec dhe Kolonjë. të goditur janë fshatrat Brozdovec, Mazrek, Cervenakë, Bishnicë, Cezmat, Goricë e Madhe, Goricë e Vogël, Kallamas, Gollomboc, Miras, Dardhë, Lavdar, Panarit, Lozhan. Në total në juglindje janë më tepër se 4000 abonentë pa energji elektrike, ndërsa grupet e punës ndodhen në terren për të riparuar çdo defekt të mundshëm, por duhet të kujtojmë se të paktën zonat e thella malore kanë probleme me amortizimin e rrjetit çka e bën më të vështirë punën e ekipeve dhe kohëzgjatjen e mungesës së energjisë elektrike.
Rreshje të shumta ka pasur edhe në territorin e Bashkisë Dibër ku trashësia në qytetin e Peshkopisë arriti në 15 cm ndërsa në zonat malore si Kalaja e Dodës, Sllova, Selishta dhe Lura trashësia kalon mbi 30 cm. Aksi Peshkopi - Bulqizë - Tiranë nuk ka borë në trupin e rrugës, duhet kujdes në Baypasin e Murrizit. Aksi Peshkopi - Kala e Dodës - Kukës kalimi normal pa zinxhirë. Aksi Ura e Çerenecit - Steblevë - Librazhd i kalueshëm, me zinxhirë pjesërisht.
Po punohet për hapjen e rrugëve të fshatrave të thella, dhe qendrave të njësive Administrative. Situata energjetike vijon pa probleme, me përjashtim të 4 fshtrave ku si pasojë e ngarkesës së borës në degët e pemëve ka pasur stakim të energjisë por po punohet për rikthimin e shpejtë të saj. ©LAPSI.al
