Milan dhe Juventus barazuan 0-0 për javën e 13 të Serie A. Në “San Siro,” skuadrat e drejtuara nga Paulo Fonseca dhe Thiago Motta ndanë pikët pa arritur të krijojnë emocione, me taktikën që triumfoi mbi spektaklin. Rastet për gola ishin të pakta, duke e bërë barazimin pa gola një rezultat të drejtë, bazuar në atë që ndodhi në fushë.
Mbi 150 vende në të gjithë botën ndoqën një ndeshje të mërzitshme në televizor. Në “San Siro,” fituan vetëm frika dhe monotonia, ku kjo e fundit ishte pasojë e së parës. Milan dhe Juventus ruajtën portat e paprekura – bardhezinjtë shtuan një tjetër “clean sheet” në koleksionin e tyre, ndërsa për Milan kjo është një ngjarje e rrallë dhe në këtë aspekt është një lajm i mirë. Megjithatë, të dy ekipet zhgënjyen shumë.
Lexo më tej: Legjenda kuqezi George Weah i habit të gjithë: "Më fal Milan, jam me Juventus"
Frika dhe mungesa e personalitetit ishin të dukshme, por me një dallim të qartë: ndërsa për teknikun Thiago Motta ky barazim pa ngjyrë është i pranueshëm – Juventus mbajti distancën me kuqezinjtë dhe ruajti pozicionin mes ekipeve kryesuese – për Milan ky rezultat është si një humbje. Kryesimi bëhet gjithnjë e më i paarritshëm, ndërsa fjalët për titullin kampion janë tashmë jashtë kontekstit. Për më tepër, pyetjet rreth mundësisë së arritjes në zonën Champions po shtohen pas çdo ndeshjeje. A është Milani në gjendje të përfundojë mes katër më të mirave? Për momentin, përgjigjja duket të jetë “jo.” Faji kryesor për këtë barazim të zymtë i përket kuqezinjve, pasi ata ishin ata që kishin më shumë nevojë të bëjnë një përpjekje. Frika nga gabimet nuk duhet të jetë më e fortë se dëshira për të provuar.
REZERVAT E INTERIT SHKATËRROJNË VERONËN
Skuadra e rezervave të Inter, në ndeshjen e parë të së shtunës, dominoi ndaj Veronës. Pavarësisht mungesave të disa lojtarëve kyç, në javën e 13-të të Serie A, ekipi i Simone Inzaghi mposhti Hellas Veronën 5-0 dhe u ngjit përkohësisht në krye të tabelës me 28 pikë. Në “Bentegodi,” zikaltërit e vendosën ndeshjen që në pjesën e parë, duke e shkatërruar skuadrën e Zanettit. Me një Asllani titullar e në fushë për 90 minuta (një asist për të) Correa (17’) hapi serinë e golave me një finalizim elegant. Pastaj Thuram (22’ dhe 25’) realizoi një dygolësh, ndërsa De Vrij (31’) dhe Bisseck (41’) e përmbyllën pjesën e parë me pesë gola, duke e kthyer pjesën e dytë në një formalitet.
