George Weah, me 147 ndeshje dhe 58 gola (dhe dy tituj kampionë të fituar) me Milanin mes viteve 1995 dhe 2000, sonte do të bëjë tifo për… Juventusin! “Që i vogël isha një tifoz i zjarrtë i Juventus, adhurues i madh i Platini: nuk kam reshtur kurrë së mbështeturi bardhezinjtë,” – shpjegon ish-sulmuesi liberian, sot aktiv në politikën e vendit të tij, të cilin e ka udhëhequr për gjashtë vite. E pastaj, natyrisht, nuk duhet harruar që djali i tij, Timothy, luan pikërisht për Juven nën drejtimin e Thiago Motta: “Mund të them se ai ka realizuar ëndrrën time, po. Dhe të mendosh që kam folur për të me Milanin, me Maldinin. Por Juve është skuadra e duhur për të, pavarësisht preferencës sime”.
Weah, në një intervistë për La Repubblica, kujton karrierën e tij: “Kur isha te Monaco, mund të kaloja te Juve, por në fund qëndrova në Ligue 1, duke kaluar te PSG, sepse Wenger më këshilloi të piqesha më shumë para se të shkoja në një kampionat të nivelit shumë të lartë si Serie A - tha Weah, që më pas foli për Milan -. Ëndërroja Juventus, por si mund t'i thosha jo Milanit? Nuk më shkoi aspak keq: pesë sezone fantastike, ende mbaj kontakte me Sebastiano Rossi, Boban, Marco Simone…”
Lexo më tej: Weah shënon i dëmtuar, Thiago Motta i bën kërkesën e çuditshme: "Tim, më jep fanellën"
KUNDËR EKIPIT TË ZEMRËS...
Fituesi i Topit të Artë 1995 flet për përballjet Milan-Juve të 30 viteve më parë: “Luaja kundër ekipit të zemrës sime, por nuk jam tërhequr kurrë dhe, në fakt, shpesh i kam shënuar (5 gola në 10 ndeshje, red.). Sigurisht, ndihesha mirë kur shënoja, por njëkohësisht edhe pak i trishtuar: gjithsesi, janë të dyja ekipet e mia të zemrës.” Po sot, kush do të fitojë? “Po fitoi Juve, jam i lumtur; po fitoi Milan, nuk do të jem 100% i kënaqur, por pak po, sepse Milan ka bërë shumë për mua”.
