Ndeshja mes Vélez dhe Lanús sapo ka përfunduar. Takimi, i vlefshëm për kampionatin argjentinas të kategorisë më të lartë, përfundoi me rezultatin 0-0. Agustín Bouzat, mesfushori i ekipit vendas, sapo kishte përfunduar intervistat e zakonshme pas ndeshjes me gazetarët. Para se të shkonte në dhomat e zhveshjes, duke zbritur shkallët drejt tunelit, ai hoqi fanellën dhe e hodhi drejt tribunave të stadiumit José Amalfitani. Ajo që ish-lojtari i Boca Juniors nuk e kishte imagjinuar ishte se në atë moment do të shpërthente një situatë kaotike.
Një fëmijë kapi fanellën e Bouzat, por një grua, që ndodhej disa centimetra larg tij, kapi skajin tjetër të fanellës. Kështu filloi një “luftë” absurde tërheqjeje, që u fitua nga gruaja. Ajo u ul pranë shoqërueses së saj dhe nuk pranoi të dëgjonte arsyet e djalit të vogël, i cili shpërtheu në lot nga frustrimi. E gjithë kjo skenë ndodhi para syve të habitur të dhjetëra tifozëve që ende ndodheshin në stadium dhe ishin dëshmitarë të një situate tejet të turpshme.
Pamja e një fëmije që qante duke kërkuar fanellën e idhullit të tij nuk e lëkundi aspak gruan, e cila qëndroi kokëfortë edhe pasi dy agjentë sigurie tentuan të ndërmjetësonin, por pa sukses. Pavarësisht kërkesave të përsëritura të djalit, gruaja nuk e lëshoi fanellën e mesfushorit. Sipas ESPN, ajo kishte thënë: “Jo, sepse unë e kërkova atë”. Kjo deklaratë ndezi edhe më shumë situatën dhe zemërimin e një tjetër tifozeje të pranishme në stadium.
Fëmija me fanellën e Bouzat
Një grua iu drejtua ashpër asaj që po mbante fanellën e Bouzat: “Duhet të të vijë turp! Ai ia dha djalit! Ai ia dha fëmijës! Shiko, po qan!”, e sulmoi ajo. “Të lutem, më jep fanellën”, kërkoi përsëri djali, duke bashkuar duart si për ta lutur. Gjithnjë e më shumë tifozë iu afruan gruas, duke u përpjekur ta bindnin të hiqte dorë, derisa ajo nuk pati zgjidhje tjetër përveçse t’ia dorëzonte fanellën fëmijës.
Bouzat, pasi mësoi për çfarë kishte ndodhur, publikoi në llogarinë e tij në Instagram një foto të djalit që mbante fanellën me krenari në duar.
