Gjykata e Shkodrës ka dhënë masat e sigurisë për 4 efektivët e forcës “Shqiponja”, që u arrestuan nga AMP për masakrën e 30 tetorit me 4 viktima.
Detyrim paraqitje, ndalim i daljes jashtë shtetit dhe pezullim nga detyra është masa për të katërt.
Kujtojmë se Agjencia e Mbrojtjes Policore referoi në Prokurori disa prej efektivëve të Policisë së Shkodrës në lidhje me masakrën e Dobraçit.
Efektivët akuzohen se shpërdoruan detyrën sepse nuk ndaluan personin e dyshuar si i treti në makinë.
Pas masakrës burimet thanë se një person i tretë kishte qenë në makinë me dy viktimat Hamza Lici dhe Arlind Bushati që u vranë në një pritë me armë zjarri.
Dyshohet se personi i tretë ka qenë ende në vendin e ngjarjes kur ka ndodhur vrasja dhe nuk është ndaluar nga efektivët e Shqiponjave.
