“Me vendimin e saj, Gjykata Kushtetuese damkosi në mënyrë të përsëritur veten e vet. Njerëz pa karakter, pa moral ligjor, mercenarë”. Kështu u shpreh ish-kryeministri Sali Berisha pas vendimit të Gjykatës Kushtetuese që konfirmoi masat e dhëna nga SPAK duke u shprehur se “detyrimi për t’u paraqitur” dhe “ndalimi i daljes jashtë vendit” nuk cenojnë punën e tij si deputet dhe se organi i akuzës për këto masa nuk ka nevojë t’i marrë leje Kuvendit.
Berisha thotë se ky është “një vendim të turpshëm, një vendim që dëshmon shkallën më të ulët të gjykimit dhe të përgjegjësisë. Një vendim që është i barabartë me një të një gjykate fakti. Një vendim që Gjykatën Kushtetuese e shpall jo-kushtetuese, anti-kushtetuese” – tha Berisha në fjalimin e tij për mbështetësit pranë banesës së tij.
“Ndjehem krenar që mbrojta Kushtetutën, qëndrova kundër puçit që i bëri parlamentit një grusht horrash në organizatën kriminale të Skapit të partisë dhe gjykatësja me 5 mbiemra. Mbrojtja Kushtetutën, ndarjen e pushteteve nga një puç i ulët. Kurse Gjykata Kushtetuese, në një vendim të turpshëm, quan jo-proporcional, nuk bën fjalë se i merret pushteti parlamentit me vendimin ekstra-kushtetuese, ekstra-ligjor” – tha Berisha sipas të cilit vendimi ishte paralajmëruar nga mazhornaca.
“Një kapitull tjetër i turpit, i paralajmëruar 10 ditë më parë nga Ulsi Manja me dokumente se Rama na njoftoi për vendimin që do merrej” – tha Berisha që paralajmëroi dërgimin e çështjes në Strazburg.
“Sigurisht miqtë e mi, çështja është në Strasburg, por është e turpshme të dërgohet një vendim i tillë. Por në narkoshtet, siç e cilësoi rezoluta e 109 partive politike, nuk ka ligj, nuk ka Kushtetutë. Narkoshteti ka vetëm vullnetin e narkodiktatorit dhe ky është vendimi i turpshëm që informoi sot, vendim në të cilin gjykata tregoi nivelin e saj mjeran” – tha Berisha. ©LAPSI.al
