Një stuhi e fortë gjeomagnetike do të ndodhë midis 10 dhe 11 tetorit. Lajmin e ka dhënë Qendra e Parashikimit të Motit Hapësinor të agjencisë amerikane Noaa, sipas së cilës stuhia diellore mund të arrijë nivelin G4, e dyta më intensive në një shkallë që varion nga G1 në G5.
Kjo do të thotë se mund të ketë probleme me rrjetin elektrik, dëmtime të satelitëve në orbitën e Tokës, ndërprerje të valëve të radios dhe ndërprerje në sistemet e navigimit satelitor. Nuk do të mungojnë edhe aurorat e dukshme në gjerësi gjeografike shumë më të ulëta se zakonisht.
“Prania e aurorave nuk është kurrë e sigurt, por në këtë rast ka një shans të mirë” – thotë Mauro Messerotti, profesor i meteorologjisë hapësinore në Universitetin e Triestes. Origjina e stuhisë gjeomagnetike që do të godasë Tokën gjendet në njollën diellore AR 3848, e cila të martën më 8 tetor prodhoi një shpërthim të fortë diellor të klasit X 1.8. Kjo shkaktoi ndërprerje të valëve të radios në zonat përballë Diellit në atë moment.
Shpërthimi u shoqërua nga një nxjerrje masive koronale, e ashtuquajtura Cme, dmth një dëbim i materies në formën e plazmës, e cila tani po vjen drejt Tokës me një shpejtësi midis 4.3 - 4.7 milionë kilometra në orë.
Ka gjithmonë pasiguri rreth momentit të saktë të mbërritjes së stuhisë aktuale gjeomagnetike. Informacione më të sakta, natyrisht, do të jenë të mundshme me kalimin e orëve, por parashikimet tregojnë se orët e vona të 10 tetorit janë më të mundshme. ©ANSA, LAPSI.al
