Prokuroria pranë Gjykatës së Shkallës së Parë të Juridiksionit të Përgjithshëm në Durrës ka nisur hetimet për një ngarkesë të dyshuar të lidhur me veprën penale të kontrabandës me mallra të ndaluara ose të kufizuara, pas referimeve nga Drejtoria e Përgjithshme e Doganave. Procedimi penal nr. 1596, datë 16.08.2024, është regjistruar për të hetuar ngarkesën e nisur nga Porti i Durrësit, e cila dyshohet të përmbajë mallra të ndaluara ose të kufizuara.
Lexo më tej: Çfarë dimë deri tani 800 ton mbetje, që po kthehen në Shqipëri
Në të njëjtën kohë, Prokuroria e Durrësit ka marrë materiale hetimore nga Drejtoria Vendore e Policisë Durrës lidhur me dyshime për veprat penale të “Transportimit të mbetjeve”, parashikuar nga neni 201/b i Kodit Penal, dhe “Shpërdorimi i detyrës”, parashikuar nga neni 248 i Kodit Penal. Këto informacione janë referuar në lidhje me ngarkesën që dyshohet të përmbajë mbetje toksike.
Prokuroria bën me dije se po kryhen veprime hetimore intensive në bashkëpunim me Zyrën Europiane kundër Mashtrimit Ekonomik (OLAF) dhe institucionet ligjzbatuese shqiptare e partnerët ndërkombëtarë. Qëllimi i këtyre hetimeve është që të sqarohen në mënyrë të shpejtë dhe të plotë të gjitha rrethanat e ngjarjes dhe të përcaktohen përgjegjësit për këtë rast.
